Iso Albin è naschì ils 24 da zercladur 1961. El ha dus fragliuns pli vegls ed in frar ch'è 15 onns pli giuven ch'el. In onn suenter la naschientscha dal frar giuven è il bab mort. Da quest temp era Iso sa decidì da far il seminari da magisters a Cuira. Pir là ha el emprendì da sunar in instrument da sturs – numnadamain la posauna. Davanr era oravant tut il chant ses hobi preferì. El ha chantà en il chor d'uffants Mustér cun il dirigent ed organist Giusep Huonder. Sco pitschen buob era Iso Albin er fascinà da l'orgla.
Seminari Cuira
Durant ses temp en il seminari da magisters ha Iso Albin cuntinuà da chantar, quai en il chor rumantsch sco er en in quartet. Per el eri atgnamain adina cler ch'el veglia dar scola suenter il seminari e forsa diriger in chor u ina musica instrumentala, s'engaschar per la cultura da ses vitg. Durant il temp da seminari è quest plan lura sa midà ed el ha atgnamain vulì ir a studegiar istorgia e lingua a Friburg suenter il seminari. Lura ha el però survegnì l'incumbensa da dar in onn scola secundara a Laax. Durant quest temp è naschida l'idea d'empruvar da far in studi da musica. E l'idea è vegnida realitad.
Conservatori Turitg
A Turitg ha Iso Albin studegià posauna ed ha durant il studi er chantà en il chor dals madrigalists. El ha lura er prendì uras da chant e cun il diplom da posauna en satg ha el anc fatg il diplom da chant e suenter er anc fatg il studi da Musica da scola II per pudair dar scola en ina scola media. Quai è grategià ed Iso Albin ha survegnì ina plazza al seminari Unterstrass Turitg nua ch'el è stà fin il 1988. Lura è el vegnì scolast da musica al seminari da magisters a Cuira nua ch'el è stà fin la midada dal seminari a la scol'auta da pedagogia. Dapi il 2001 è el stà scolast da musica a la scola chantunala ed ha er dà uras da posauna e chant a la scola da musica Cuira. Dasper ha el sunà durant blers onns en la Kammerphilharmonie Graubünden e da temp en temp er dirigì divers chors (Coramor, Chor mischedau Rezia, Bündner Vokalensemble, Chor dils Larischs).
El po guardar enavos sin ina vita da musica bain emplenida e po uss giudair la pensiun.
Iso Albin en emissiuns da RTR
Artg musical dals 2-11-2025: Il cudesch da chanzuns «Consolaziun dell'olma devoziusa»
Telesguard dals 2-11-2006: Access scientific a la collecziun da chanzuns popularas da Alfons Maissen
Magazin da cultura dals 9-06-2012: La chanzun, discurs cun Iso Albin.
