En tschintg stanzas èn exponids 90 differents maletgs da Heiner Kielholz. Ils maletgs èn tuts en formats pitschens e mussan ses stil da viver simpel. In'abitaziun cun be in letg, ina maisa, ina sutga ed ina pigna da laina.
Mintga maletg mussa in'autra perspectiva ed auters detagls. Sper ils maletgs da l'abitaziun datti era da quels cun in sguard or da fanestra. Era quels mussan la vita simpla da l'artist.
El viva cun pauca rauba, ma quella rauba ch'el ha, è ad el fitg custaivla.
Cun quai ch'ils maletgs èn en format pitschen, ha il curatur decidì da betg scriver las legendas sper ils maletgs, mabain laschar l'art suletta vi da la paraid. Era quai exprima puspè il caracter da l'artist.
Maletgs da Heiner Kielholz
-
Bild 1 von 3. San Carlo (Cucina). Bildquelle: Museum d'art Grischun.
-
Bild 2 von 3. San Rocco. Bildquelle: Museum d'art Grischun.
-
Bild 3 von 3. San Rocco. Bildquelle: Museum d'art Grischun.
Tut è simpel e senza grondas inscenaziuns. Per part han ils maletgs roms, auters betg. Tut ils roms vegnan era fatgs da l'artist sez. Il museum n'ha betg enramà insatge.
Tut ses esser è reducì. Il stil d'abitar, il contact cun autras persunas u il sortir.
Il stil simpel da viver da l'artist n'è betg mo da vesair en ses maletgs mabain er en ses cumportament. El na vul betg esser en il center dal public. Uschia desista el era da preschentaziuns da las exposiziuns u da dar intervistas a las medias.