Orlando Steiner di, ch’el dovra squitsch e blera lavur – uschiglio manchia insatge. Mintgatant stoppia el dentant era far in «reset». Quel fetschia el per il solit il settember cun ir a chatscha.
Mintgatant è il simpel in grond luxus.
Sper sia lavur da cussegliaziun tar «Quant» e co-mainagestiun tar «Clerezza» a Flem è Orlando Steiner era docent da giast a la scola da hotellaria a Passugg. El è era coach a la scola e commember da la giuria nua ch’il businessplan da scolaras e scolars vegnan giuditgads.
Jau poss profitar extrem da questa lavur a la scola da hoteliers a Passugg.
Orlando Steiner possia profitar extrem da questa lavur a la scola era per «Quant». Quai tegnia d'ina vart giuven e mussia era nua che la via va, co ch'ils hoteliers futurs pensan, di Orlando Steiner en il Profil.
Chattà la passiun per ir enturn cun glieud, l’hotellaria ed il turissem ha Orlando Steiner cun tschintg, sis onns sin il campadi da ses tat e sia tatta a Zernez. Gia sco buob ha el sez pudì decider chaussas ed era surpiglià responsabladad.
Cun mes tat hai jau cun 10 onns pudì ir l’emprima giada cun l'auto sin il camping e sun bunamain ì sur ina u l’autra tenda ora.
Ad Amsterdam ha Orlando Steiner lura gì sia emprima plazza sco schef da finanzas en l’hotel Marriott, in hotel da tschintg stailas cun 392 chombras. L’hotel saja ina vaira maschina da squitschar raps, ha ditg Orlando Steiner. Las spetgas sajan lasuenter era stadas fitg grondas.
Orlando Steiner guarda gugent enavos sin sia vita. El ha emprendì d’enconuscher blera glieud ed el è stà en blers pajais sin quest mund, perfin en la China per bajegiar si ina collavuraziun.
Ses temp liber passenta Orlando Steiner gugent sin la plazza da golf nua ch’el dat era golf cun ses dus figls. Savens sin il plaz da golf a Sagogn nua ch'el sa gida er magari, quai er en connex cun ils «special olympics», il sport per umans cun disturbis cognitivs. La squadra dals special olympics da golf tranescha numnadamain a Sagogn. Questa lavur dettia motivaziun ed er engraziaivladad per tut quai ch’el ha.
L’engaschi per ils «special olympics» è mia contribuziun a l’inclusiun. Quai fatsch jau enorm gugent. Pertge: sch’insatgi da la squadra tutga la balla, lura festivain sco sche nus fissan campiuns olimpics.