(sursilvan) Prender cumiau, dar adia ad enzatgi – quei ei ina caussa che negin fa bugen. Mintga creatira lai anavos fastitgs. E piarder in animal carezau e fidau fa mal, porta tristezia e lai anavos ina largia. Segir, animals ein buca carstgauns. Mo in animal da casa ei savens dapli che mo in animal. El accumpogna nus duront in liung temps atras il mintgadi. El ei cheu per nus senza gronds plaids. Porta plascher e satisfacziun, sa tedlar, ei consolaziun en temps stgirs.
Aschia ei quei era stau tier nies tgaun Clio. Ina mischeida da via che semegliava ad in labrador. Ina bun’olma, ners, gronds, magliatut ed empau in smarschun. El ha accumpignau nus duront biars onns, ha viu co nos affons ein daventai carschi ed ha termagliau cun nos beadis ed accumpignau mei beinenqualga en scoletta.
Nies Clio veva in fin sensori e sch’el vess saviu tschintschar, vess el saviu tradir beinenqual misteri a nus. Cun siu nas bletsch s’avischinava el a nus e deva ina buntganada. Ina strihada sul dies vi, in’embratschada ed il mund veseva gia ora auter.
Mo era nies Clio ei vegnius els onns. Ed il temps da dar adia ei vegnius pli datier. Quella ga vein nus vuliu dar adia a nies tgaun a casa, en siu canaster el ravugl dalla famiglia. Quei ei stau ina biala decisiun.
In animal da casa ei savens dapli che mo in animal. El accumpogna nus duront in liung temps atras il mintgadi. El ei cheu per nus senza gronds plaids. Porta plascher e satisfacziun, sa tedlar, ei consolaziun en temps stgirs.
Ina sera l’entschatta schaner ei la veterinaria vegnida tier nus. Nus eran serimnai spel canaster e nossa beadia pintga seseva el canaster cul tgaun. Clio ha survegniu enzatgei per quietar. E tec a tec la dierma. Ei ha cuzzau in mument. La pintga saltava entuorn il canaster e capeva buca propi tgei che schabegia. Tuttenina eis ella semessa sper Clio e detg: «Clio tutta!» Ed en quei mument eis el sedurmentaus per adina. Bein in mument da tristezia e tuttina levgiament.
Il ritual persunal dad arver la finiastra, arder ina candeila e suenter in mument purtar nies bien cumpogn giuado ha dau confiert a nus.
Adia Clio, stai bein! Sche jeu seregordel vid quei di, lu cun in bi sentiment d’engrazieivladad. Restau ei a nus in fastitg dalla toppa e biaras e bialas regurdientschas communablas.
