Pled sin via - Marcel Köhle: «La charta dal Grischun e quella da l'olma»

(sursilvan) Avon biebein duas jamnas vein mia partenaria ed jeu fatg ina pli liunga spassegiada da Filisur a Bravuogn. Per l'ina eis ei stau ina biala viandada, per l'autra er'ei per nus l'entschatta dad in niev project communabel.

Lezza sonda suentermiezdi vein nus vein fatg il plan da girar inagada en nossa veta tras tut las valladas grischunas. Per quei intent vein nus lu cumprau ina carta geografica dil Grischun. Sin quella carta vein nus schon inaga marcau tuttas rutas che nus vein gia fatg els davos onns. Ell' Engiadina, el Grischun Central, sco era en Surselva dat ei schon las empremas reits da vias sur pass e tras cavorgias che colligian ils vitgs en las differentas valladas. Ed enzaco eis ei in bi sentiment da veser sco quellas reits da colurs glischontas creschan tier ina gronda reit che cuvieran plaunsiu l'entira carta dil cantun Grischun 

Buca mo nies cantun ei ina tiara plein vias, mobein per aschidadir era nossa olma. – Nossa olma ei sco ina gronda cuntrada cun ina gronda reit da vias. Certinas meinan nus en altezias suleglivas, autras tras valladas stretgas. En quella vasta cuntrada dall'olma dat ei loghens da legria, dat ei fontaunas che refrestgentan e dattan nova forza – mo ei dat era desierts nua che nus perdin mintgaton nossa via e savein buca pli en tgei direcziun che nus duein ir.

Podcast Pled sin via

Il «Pled sin via» dat mintg’emna in impuls teologic, spiritual u etic e metta en il center l’uman ed il mintgadi.

Ulteriurs audios e podcasts

Aschia savein nus era leger las historias biblicas. – Sche Abraham parta da sia patria senza saver nua ch'el va, lu muossa quei ch'el ha en si' olma ina gronda fidonza en Diu. El fida che Dieus vegni schon a menar el sillas dretgas vias. Medemamein exprima era la historia da Moses e quella dil pievel d'Israel ina gronda fidonza en Diu. Mo sper la tematica dalla fidonza en quels raquents dat ei era muments da desierts, muments da frustraziun, nua ch'ins senta co ch'il pievel da Diu piarda la pazienza e metta schizun Dieus en damonda.

La bibla ein pleina da quels maletgs! Ella exprima en differentas historias che nus essan creatiras cun in'olma: nus partin e semettein sin via, encurin senn, perdin mintgaton l'orientaziun, mo anflein savens puspei fastitgs che meinan nus vinavon silla via da nossa veta. Buca adina ein las vias bein veseivlas, mo tscheu e leu anflein nus tuttina in muossavia che dat puspei segirtad pils proxims pass.

Nossa olma ei buca ina carta cun ferms cunfins. Ella semida cun mintga experientscha, cun mintga carstgaun che nus entupein. – Ed aschia giavischel e sperel jeu era empau, che tut quellas viandadas tras il Grischun, fetschien buca mo pli enconuschent il Grischun a mi, mobein era las diversas cuntradas da mi'olma.