(sursilvan) Dat ei musica adattada per Vendergis sogn? Sche mia risposta fuss in na, lu offendess jeu beinenqual cumponista e cumponist ch’han scaffiu ovras aposta per quei gi. Secapescha, ei dat musica adattada, musica e texts ch’expriman il caracter da quei gi:
La tragica dalla via dalla crusch siado tochen che Jesus penda vid la crusch, ferton ch’ina spirala meina la realitad tochen giuaden ella profunditad dalla mort. Ils davos plaids e suspirs vid la crusch. Il mument che Jesus lai pender il tgau ed ei morts, gie veramein morts. La dolur dalla famiglia en malencurada, dalla mumma.
Atgnamein eis ei bunamein il cuntrari: Il gi da Vendergis sogn ei memia cuorts per tut la musica, tut las emoziuns, tut ils patratgs che sedattan neu dalla passiun e mort da Jesus Cristus. Quei ei gie la finala era in motiv ch’ei dat la jamna sontga ni insumma il temps da Cureisma. E tuttina ei il Vendergis sogn in mument pulpiu, nua che tut vegn ensemen.
Mo tuttina, jeu empleness buc memia spert il vit.
Per mei persunalmein ein ils gis da Vendergis sogn tochen Pastgas ina opera en treis acts. Igl emprem act fuorma il Vendergis sogn ensemen cun sia vigelgia, pia cun la sera da Gievgia sontga. Tut quels eveniments da tristezia, da tema, da profunda carezia ed era d’in immens abandun, tut quei cuntegn igl emprem act.
Il tierz act pon ins s’imaginar, gliez ei Pastgas. Ni getg pli precis la damaun da Pastgas. Il stgir semida en clar, las dunnas anflan la fossa vita, Maria Madleina inscuntra Jesus levaus. Legria, curascha, iniziativa, carezia, engrazieivladad domineschan. Tut quei – e aunc bia dapli – ei il tierz act.
Denter quels dus acts empleni e pulpi, schai il secund act. Nus savein dar num ad el la Sonda sontga. El ei buca Vendergis sogn e buca la damaun da Pastgas. Per quei gi dat ei era musica e cumposiziuns, denton entrass jeu bugen en discussiun cun cumponistas e cumponists. Per mei ei quei gi da Sonda sontga il gi dalla pagina vita. Cheu astga il plaid muncar, cheu astga la musica muncar. Forsa ei gest gliez sentiment quel che duei esser presents, numnadamein il sentiment ch’enzatgei maunchi.
Ina buna cumponista ed in bien cumponist vegn probabel a saver cumponer in secund act sin il sentiment dil muncar. Mo tuttina, jeu empleness buca memia spert il vit. Pia, sche buc ina entira pagina vita per la Sonda sontga, lu silmeins ina mesa pagina vita. Ina surfatscha vita, alva, metta. Nuot.
