(vallader) Ir svelt per aua pro’l bügl. Ma che dia svelt? Amo minchatant vaja ün pa plü lönch! Na ch’eu füss ün schgnögn, ma il vaschin para be da spettar ch’eu vegna cun la sadella … Na sainza radschun han noss antenats fabrichà lur balcuns torts! Üna jada vain politisà, dürant e dadour la stagiun vain discurrü in latin da chatschaders e lura vegnan barattadas las nouvas.
Ir svelt per aua pro’l bügl. Il bügl es bler daplü co aua da la funtana, id es ün lö d’inscunters, ün lö ingio chi’s fuorman opiniuns, ün lö da distracziun e d’infuormaziuns. O almain d’eira’l quai üna jada, dal temp chi’s badaiva amo perche cha’ls cumüns engiadinais sun fabrichats cullas chasas orientadas intuorn bügls.
Quai chi d’eira avant ün pêr generaziuns amo tuot solit in Engiadina Bassa, capita tras l’istorgia umana. Uschea quinta eir l’evangelist Joannes d’ün inscunter vi d’ün bügl.
Stanguel dal viadi, as tschantet Gesu sper la funtana; id eira intuorn mezdi. Üna duonna samaritana gnit per tour aua. Gesu la dschet: Dà’m da baiver! […] Co mâ, replichet la duonna samaritana, dumandast tü chi est ün Güdeu, da baiver a mai chi sun üna samaritana? (Perche ils Güdeus nun han ingüna comuniun culs Samaritans.) (Joan 4,6–7.9)
Il bügl es bler daplü co aua da la funtana, id es ün lö d’inscunters, ün lö ingio chi’s fuorman opiniuns, ün lö da distracziun e d’infuormaziuns.
Ir svelt per aua pro’l bügl. Quia nu s’inscuntran dimena vaschins, ma ün hom ed üna duonna, ün ester chi’d es da passagi ed ün’indigena, essers umans da differentas culturas e crettas chi nu s’inscuntressan pel solit.
Ma Gesu es apunta cuntschaint per inscunters extraordinaris:
Gesu la respuondet e dschet: Scha tü cugnuoschessast il dun da Dieu e chi chi ais quel chi’t disch: Dà’m da baiver, schi avessast tü svess rovà, ed el t’avess dat aua viva. (Joan 4,10)
Ir svelt per aua pro’l bügl.
Cristus ha radschun: na be aua frais-cha e netta correspuonda ad ün bsögn fundamental da l’esser uman, ma eir il lö d’inscunter, la peida da pudair star salda ün mumaint ed implü: la cretta, la quala Gesu imprometta a seis visavi, probabelmaing mez riond.
Tgnain chüra da noss’aua e da lös d’inscunter, pigliain temp ün per tschel e sögnain noss’aigna cretta cun inscunters sur cunfins e pregüdizis oura!