Pled sin via - Andrea Cathomas-Friberg: «Collià cun l'entir mund»

(Sursilvan) En nies mintgadi essan nus savens colligiai sur las pli differentas plattafuormas cugl entir mund. In clic e gia cuoran las informaziuns d’in liug a l’auter. E sper tut ils clics ed en nies mund che cuora aschi spert dat ei tuttina aunc muments nua che las grondas plattafuormas han pausa. Quels numnel jeu plattafuormas humanas, nua ch’ins pren peda da s’entupar e veser in l’auter.

Ina da quellas pintgas plattafuormas ein ils usits. Per questa fin d’jamna ei quei igl usit da trer schibettas a Danis e Dardin. L’emprema sonda da cureisma stat gia dapi decennis igl usit paganil el center. In usit che colligia giuven e vegl, grond e pign. Igl ei in usit cun bia bialas anecdotas e regurdientschas. Ed era sch’il temps semida, pils incarnai da Danis-Tavanasa e Dardin ha el buca piars il fiug. Era en quei temps virtual ein las sentupadas impurtontas. Gl’emprem ein ils buobs, ils giuvenils e per part ils babs s’entupai en scola. Leu ei vegniu trafficau e luvrau e fatg las schibettas. Ed uss ei tut preparau en ina liunga cadeina da schibettas.

La sonda sera a Danis suenter messa, ed a Dardin empauet pli tard ves’ins gia dalunsch il til da tizuns. Ins auda ils giuvenots a cantar e far canera. Il fiug arda leusi sin Chistatscha ni dadens baselgia. Tut che spetga cun tensiun sin l’emprema schibetta. Tgisà tgi che survegn igl emprem salid giu dils aults? Cun in surrir ni in bravo vegn priu encunter quei salid e pli tard la sera lu remunerau cun in bien puschegn. Gie, tut che s’entaupa u en la Steila a Danis, nua che voluntaris han aviert l’ustria per in di. Ni a Dardin en tenda scaldada e preparada dallas giuvnas dall’uniun da giuventetgna. Ina sentupada da prender temps da seveser, sediscuorer e ver endamen.

Era sche Vus veis forsa gia viu enqual «clic» da nies usit, la sentupada el liug. Quei eveniment vegn mai vi aschi bein sco en realitad. E saveis tgei? – La schibetta para da colligiar nus tuts in cun l’auter. Ina schibetta ardenta che sgola tras la notg colligia il tschiel e la tiara, ed aschia nus e gl’entir mund. Tut pascheivlamein e cun pauca canera. «Oh tgei biala schibetta per tut quels che sestentan per ina buna cuminonza e per bials muments.»

Podcast Pled sin via

Il «Pled sin via» dat mintg’emna in impuls teologic, spiritual u etic e metta en il center l’uman ed il mintgadi.

Ulteriurs audios e podcasts