(sursilvan) Pertgei ei enzatgi spirituala ni religiusa? San ins semplamein decider quei? Ni ei quei enzatgei ch’ins ei ni halt eba buc?
En mia veta sundel jeu adina puspei stada alla tscherca. Gl’emprem sco giuvenila ella baselgia, pli tard en differentas praticas spiritualas. Jeu hai empruau bia, mo haiel mai anflau miu dacasa. Aschia haiel jeu realisau: Jeu creiel semplamein buca vid quellas differentas filosofias, era sch’enzatgei en mei vuleva crer vidlunder. Il desideri dad anflar rispostas sin mias damondas essenzialas era fetg ferms.
Aschia hai jeu acceptau ch’jeu sun buca spirituala, schegie che jeu hai empruau. Jeu sun sezza stada confruntada cun ina gronda crisa. E lu era ei grev da buca haver quei sustegn spiritual. Adina puspei vegnevan patratgs sco: «Jeu giavischel da saver crer vid ina forza divina, in senn pli grond.» Ed il proxim patratg era: «Ei va buc e quei saiel jeu buca midar.»
Il desideri dad anflar rispostas sin mias damondas essenzialas era fetg ferms.
Avon in pèr onns ha ina amitga raquintau che siu frar hagi in di decidiu da crer vid entgins concepts spirituals. Ei seigi stau ina decisiun plitost raziunala. El hagi giu l’impressiun ch’esser spirituals levgescha la veta, cunzun en muments da crisa. Ei seigi pli lev da supportar crisas, sch’ins crei vid in senn pli grond ni vid ina veta suenter la mort.
Quei patertgar da quei frar ha dau a mi ina nova perspectiva. Quell’idea ch’ins sappi decider tgei ch’ins crei ha lubiu a mi dad esser in tec pli flexibla cun mia cardientscha, ni eba plitost nuncardientscha. Esser eis ei aschia ch’jeu creiel aunc adina buca vid forzas divinas ni ina veta suenter la mort. Quei ha buca midau.
Mo tgei ch’jeu hai midau, ei che quellas ideas ateisticas ston buca pli esser aschi impurtontas per mei e ch’jeu astgel era sepiarder en patratgs plitost spirituals ni imaginaziuns sco ina veta suenter la mort savess veser ora. Jeu mettel mezza ussa buca pli en ina categoria. Igl ei pli fluid, e quei permetta ina certa luccadad e creativitad. Resultau da quei process ei in pign tatu che fa endamen ch’igl ei en uorden da mintgaton crer vi dad ideas spiritualas.
