(vallader) Chi es vairamaing quist Cristus, dal qual ils predichants discuorran uschè suvent? Perche vess el dad esser uschè important per quist muond e per minchün da nus? Che ha el da chefar cun mai e cun mia vita? E co poss eu gnir in contact cun el?
Na, Cristus nun es il nom da famiglia da quella persuna istorica cul nom Gesu chi ha vivü avant 2000 ons illa regiun dad Israel e Palestina. Cristus nun es eir na be il titel cha Gesu ha surgni da sias scolaras e seis scolars davo sia mort e resüstanza.
Scha tü voust savair chi cha Cristus es e scha tü voust dafatta far l’experienza da Cristus, schi riva teis ögls, tias uraglias e teis nas. Riva tuot teis sens. Nu stübgiar massa bler, ma riva teis cour!
Cristus nun es il nom da famiglia da quella persuna istorica cul nom Gesu.
Va oura illa natüra e doza sü ün crap: Quia es Cristus. Tocca aint ün lain: Eir quia es Cristus. Savura vi dad üna fluor: Darcheu Cristus. Taidla il vent illa bos-cha: Cristus. Doza teis ögls sü vers las muntognas: Eir qua Cristus. Observa las stailas: Adüna Cristus. Ed impustüt – resainta teis cour: Cristus. Dapertuot ed adüna: Cristus.
Ma chi es quist Cristus? Cristus es l’essenza da tuot quai chi exista. Cristus es l’esser chi pussibiltescha a tuot las fuormas dad esser. Cristus es la forza chi s-chaffischa vita our dal nöglia. Cristus es il princip transfuormativ chi fa vita our da la mort. Cristus es il minz, l’essenza ed il plü profuond e vair esser da minchün da nus e da tuot quai chi exista, existiva e gnarà dad exister. Cristus es la matrix e la DNA da temp, spazi e tuot esser. Cristus es l’amur chi ans collia tuots insembel ed ans lascha quatras fuormar la gronda famiglia universala.
