A tgi tutga l'aua?
«L'aua è tar nus ina chaussa democratica, l'aua è in emprest. L'uman è obligà da dar vinavant l'aua uschia sco nus la retschevain, numnadamain aua netta, uschia che ella po dar vinavant vita», declera Ernst Bromeis.
Ma – essan nus conscients dal privilegi d’avair abundanza d’aua netta? Essan nus conscients da las valurs da l’aua netta per nossa vita, per noss ambient e natira, per tut l’existenza globala?
En il magazin d'etica e religiun Vita e Cretta dat l'ambassadur da l'aua ina giada dapli sia vusch a l'aua per respunder dumondas filosoficas ma era dumondas existenzialas en connex cun l'aua e la muntada ch'ella ha per la societad per il mund. Cun Ernst Bromeis tschertgain nus respostas a dumondas sco: A tgi tutga l'aua u ha l'aua dretgs?
L'aua n'ha nagina intenziun ed uschia nagin dretg, la dumonda è – tge faschain nus umans cun quest regal?
En il rom dal Di da mundial da l’aua dals 22 da mars, accumpogna Gaby Degonda ad Ernst Bromeis sper las rivas da l’aua. In lieu da cruschada, per straduns, electricitad e viafier. In lieu che po fascinar e chaschunar snuizi en il medem temp. Là nua ch'il Rain anteriur s'inscuntra cun il Rain posteriur per lura currer sco Rain vers la Mar dal nord. «Quai è in lieu magic, dus flums s'inscuntran, han forsa in cumbat – tgeinin è pli ferm e tgenin ha fatg il pli lung viadi? Ma lura perdan questas dumondas impurtanza e las auas cuntinueschan lura en armonia, ina metafra per l'umanitad», di Ernst Bromeis.
Avant 20 onns n'avess la societad betg chapì l'impurtanza dad ina Chasa da l'aua.
L’intenziun da la Chasa da l’aua è da respunder dumondas dal temp, dumondas da la societad, economia e ambient che vegnan adina dapli a la surfatscha e che ans occupan en Svizra e sin tut il mund.
Oz èn la Chasa d’aua e la Biblioteca da l'aua en il chastè da La Punt Reichenau in lieu d’inscunter, in lieu per interacziun e scolaziun. La Chasa da l'aua sco era la Biblioteca da l'aua en lieus nua mintgin e mintgina po s'approfundar en la tematica e l'impurtanza da l'aua, grazia ad installaziuns, cudeschs, visualisaziuns e blera infurmaziun.
«La Chasa da l'aua è in lieu per far attent l’opiniun publica, che l'aua n'è betg ina resursa infinita, che ella è elementara per l'umanitad e che ella unescha – che ella è la vita», di Ernst Bromais cunfundatur da l'emprima Chasa da l'aua en Svizra.
Biblioteca da l'aua
-
Bild 1 von 8. Ernst Bromeis – ambassadur da l'aua. Ernst Bromeis è savens da viadi sco referent per sensibilisar la societad per il dretg dad aua netta. Bildquelle: MAD.
-
Bild 2 von 8. Collecziun d'aua mundiala. En la biblioteca da l'aua èn exponidas buttiglias emplenidas cun aua da tut las parts dal mund. Ernst Bromais retschaiva savens aua da l'ester. Bildquelle: RTR.
-
Bild 3 von 8. Proverbis dal mund. En la Chasa da l'aua a Reichenau sa chatta ina paraid da chartas postalas blauas cun proverbis davart aua en tut las linguas dal mund. Bildquelle: RTR.
-
Bild 4 von 8. Resonanza cun aua. La Biblioteca da l'aua è in lieu interactiv e lieu d'inscunter e reflexiun. In lieu per far conferenzas da video cun il rest dal mund. Bildquelle: RTR.
-
Bild 5 von 8. Aua e nutriment. L'ovra artistica davart la la dumonda: Tgi ha access a la schuppa? Basta schoppa per in e scadin uman? Schoppa è pussaivla be cun aua netta. Bildquelle: RTR.
-
Bild 6 von 8. Aua da tes vitg, da mes vitg. Ernst Bromeis retschaiva fitg savens aua da flums, uals, funtaunas da tut il Grischun, da la Svizra, dal mund. Bildquelle: RTR.
-
Bild 7 von 8. Tavla da giasts. Sin questa tavla pon visitadras e visitaders scriver lur visiun en connex cun l'aua. Bildquelle: RTR.
-
Bild 8 von 8. Cun ils pais en la vita – en l'aua. Ernst Bromeis cun ina gruppa da studentas e students a chaschun d'ina guida tar la Chasa da l'aua. Bildquelle: RTR.