(sursilvan) Affons enqueran la lieur da tschugalata, zuppada en iert. Sin meisa dat ei da solver ovs colurai. Avon baselgia arda il fiug da Pastgas e duront messa vegn la candeila da Pastgas benedida ed arsa per l‘emprema gada. Quei ein tut elements da tradiziun enconuschents. Mo tgei han quels usits da far culla levada da Jesus Cristus ch‘ils cristians festiveschan da Pastgas? Ins savess tgunsch manegiar: nuotzun. Mo ei quei propi aschia? Lein oz dar in‘egliada.
Nus entschevin culs ovs. Ils emprems cristians hagien duront il temps da gigina buca magliau ovs. In iev cunteneva per els numnadamein veta – ed era in simbol per la fossa da Jesus Cristus. Era la fossa cunteneva numnadamein veta: quella dil nievlevau. Pér pli tard hagi ins entschiet a colurar ils ovs cun colur cotschna – sco simbol per il saung da Jesus Cristus. Ils ovs colurai cotschens eran aschia in simbol per la passiun e mort da Jesus e la levada da Cristus.
Ils ovs colurai cotschens eran aschia in simbol per la passiun e mort da Jesus e la levada da Cristus.
Lein cuntinuar culla lieur. Damai ch’ella fa baul pigns, valeva ella gia avon il temps cristian sco simbol per la fritgeivladad e cunquei per la veta. Daco ch’ella ei daventada in simbol per Pastgas ei denton buca sclariu. Avon 1800 ha en differentas regiuns mintgamai in auter animal zuppau ils ovs da Pastgas. Emprovas da giustificar la lieur da Pastgas ha ei denton gia dau avon pli che 1000 onns – denton senza grond success. Singulas vuschs interpretavan a sias uras la lieur sco simbol per Jesus Cristus. Lur idea: sco la lieur dormi Jesus Cristus mai.
E co stat ei cul fiug da Pastgas? Lez simbolisescha la glisch che Jesus Cristus ha purtau el mund. Perquei vegn la candeila da Pastgas arsa vid il fiug da Pastgas. Cun arder lur candeilas pintgas vid la candeila da Pastgas tegnan ils cartents enta maun quella glisch e san purtar ella egl entir mund.
Cars lecturs e caras lecturas, seigi la lieur da tschugalata alva, brina ni nera, ils ovs colurai dils agens affons ni biadis ni magari cumprai, e seigi il fiug da Pastgas pigns ni gronds – da cor giavischel jeu a Vus: Bialas Pastgas.
