(sursilvan) Bunas amitgas, buns amitgs e famiglia. Quellas duas gruppas vegnan il bia numnadas, sch’ei va per l’impurtonza da contacts socials. Ei dat numerus studis che muossan: Haver in contuorn stabil ei il pli impurtont factur per nossa cuntentientscha ella veta. Sesentir bein en in contuorn social gida da reducir stress, augmenta la resilienza e para schizun da gidar nossa sanadad corporala. Sin mia via persunala atras difficultads psichicas haiel jeu empriu con impurtont ch’igl ei da saver dumandar per agid e da saver quintar cul sustegn da mias amitgas e mes amitgs.
Sesentir bein en in contuorn social gida da reducir stress, augmenta la resilienza e para schizun da gidar nossa sanadad corporala.
Avon in pèr meins haiel jeu legiu in artechel che di che buca mo quels contacts socials pli intensivs ed intims ein impurtonts, mobein er ils contacts pli cuorts. Igl artechel formulescha schizun la tesa che quels contacts cuorts portan ina valur enorma. In studi da l’universitad americana Harvard ha mussau ch’ina reit da contacts socials fetg diversa garanteschi cuntentientscha. Divers munta: mias bunas amitgas, collavuraturs en miu biro, collegas ella societad da musica, denton er interacziuns culla vendidra en stizun ni cul conductur el tren.
Quei artechel ha svegliau bia patratgs. Cunzun en temps psichicamein pli grevs haiel jeu la tendenza da seretrer anavos. En quels temps han magari mo fetg paucas persunas access a mia veta interna e contacts cuorts e spontans cun persunas, ch’jeu entaupel casualmein, haiel jeu bunamein buca pli. Jeu mondel lu il bia mo pli ord casa cun musica ellas ureglias ed isoleschel memezza da miu contuorn. Mo forsa ei exact quella strategia in obstachel per vegnir orda quella ruosna mentala? Fuss in’autra strategia forsa pli avantagiusa?
Jeu crei ussa buc che dad esser semplamein pli hoflia enviers la vendidra en stizun vegn a sligiar tut mes problems. Mo tuttina ha igl artechel dau a mi igl impuls da sortir magari da mia zona da confort e dad empruar ora novas strategias per navigar atras temps pli difficils cun forsa in tec dapli levezia.
