Il temps para dad ir sco da sgular. Gia stein nus all’entschatta dall’jamna sontga, la dumengia da Palmas. Il di nua che nus seregurdein sco Jesus ei entraus cun pumpa e gloria el marcau da Jerusalem. Tut che era serimnau, ha beneventau el cun cloms da hosanna e rasau ora lur mantials per el. Schegie che quei fatg schai lunsch anavos ha el piars nuot da si’actualitad.
Il davos temps havein nus viu ed udiu tontas gadas ch’ei han rasau ora in teppi tgietschen ni beige per da tut ils promis dapertut sil mund. Tscheu e leu ei vegniu partiu ora premis per films, musica, medaglias da sport ed aunc bia auter e festivau success e trends cun grondas shows e dabia prominenza.
Nus vivin en in mund spert e cun adina novas midadas. Quei ch’ei oz «in» ei damaun gia vargau. Mintgadi cumparan ellas medias ni sgulatschan sco reclamas en casa novs trends, novas modas. Ins savess magari survegnir in tgau stuorn, sch’ins less empruar ora tut. E per restar «in» cuoran biars suenter a mintga trend ed enqueran il dretg – il dretg senn da viver – la dretga moda e maniera da restar sauns – il dretg stil – il cletg – la ventira – la cuntentientscha.
Mo ei quel propi d’anflar? Sai jeu cun daners e pussonza cumprar tut quei che jeu enquerel? Gida quei mei a vegnir cuntents?
Inaga dapli eis ei per nus nuot aschi sempel d’anflar la dretga via, il dretg equiliber. Forsa schizun anflar ina via che meina alla mudestadad, viver pass per pass e sefidar ch’ei vegni bien.
Ina cuorta historia duei accumpignar nus oz atras l’jamna sontga ed envidar nus da far enqual patratg. Aschia raquenta ina historia dil pievel Chassid:
Il Rabbi Naftali viva en in grond marcau cun bialas casas e curtgins. Cunquei che ils patruns casa levan viver en segirtad e ruaus fuva ei usit da schar pertgirar tut il possess dad in guardian. Quels umens stevan la sera avon la casa dil patrun e fagevan patruglia.
Ina sera va Rabbi Naftali a spass tras in quartier. Cheu entaupa el in guardian che va, per muentar empau las combas d’in cantun dil curtgin a l’auter. Il Rabbi stat eri e damonda: «Per tgi s’engaschas ti cheu cun ir vi e neu?» – Il guardian declara liung e lad e finescha siu rapport cun la damonda: «E per tgi s’engaschas ti, cun ir cheu a spass?»
Il Rabbi ei gl’emprem mument tut perplex e rispunda: «El mument per negin!» Tuttina fatschenta la damonda dil guardian el. El ponderescha tut ruasseivlamein e damonda la finfinala: «Eis ti forsa promts da vegnir cun mei e survir a mi?» – Il guardian mira sin el e di: «Gie bugen, mo tgei hai jeu lu da far?» Il Rabbi rispunda: «Oh principalmein far endamen, far endamen a mi per tgei ni per tgi che jeu s’engaschel!»
