Tgi che tschertga ina abitaziun, lez sa – uschè simpel n’è quai betg. Perfin tar nus en il Grischun datti regiuns nua ch’i regia ina veritabla stgarsezza d’abitaziuns pajablas.
Quai na stoppia dentant betg esser, di Reto Martinelli. El lavura tar l’organisaziun «Wohnen Schweiz» ed è osp da l’emissiun Profil. Sia proposta è da promover la fundaziun da cooperativas per la construcziun d’abitaziuns. Da persvader la populaziun ubain las vischnancas saja mintgatant dentant schon ina sfida, mo sco figl da pur haja el qua ina buna strategia. En il Partenz haja el per exempel dumandà co ch'il manaschi sin l’alp saja organisà. La resposta saja stada che quai saja ina corporaziun.
Tenor il dretg d’obligaziuns è ina corporaziun ed ina cooperativa gist il medem. Pia faschais vus gia quai che nus vulain far cun ina cooperativa sin il champ da l'abitar.
Durant sia lavur tar l’organisaziun «Wohnen Schweiz» haja el pudì accumpagnar inqual project, di Reto Martinelli. Betg mo en la Bassa mabain era en il Grischun. Era là dettia projects e persunas innovativas che veglian meglierar la situaziun e che vesian ils avantatgs da cooperativas.
Pervia da Beni Thurnheer fatg matura
Creschì si è Reto Martinelli a Strada en l’Engiadina Bassa, pli exact a Chaflur. Ch’il frar vegl surpiglia il bain puril era gia baud cler, perquai ha el ponderà da daventar vendider d’artitgels da sport. Ina scolasta haja lura dentant ditg ad el che cun questa professiun pudessi quai vegnir grev d’avair famiglia. Damai ch’el guardava ensemen cun ses bab adina la dumengia sport e crititgava la prestaziun dals moderaturs – haja ses bab ditg ad el ch’el duaja pia commentar sez.
Jau hai lura guardà tge scolaziun ch’in schurnalist da sport sco Beni Thurnheer dovra. E cunquai che tut quels eran «lic. iur.» ed han pia fatg in studi da giurisprudenza, sun jau m’inscrit a l’Institut otalpin a Ftan per lura suenter la matura pudair ir a Turitg a studegiar giurisprudenza.
A Turitg ha el lura era cumenzà il studi da giurisprudenza, dentant ha el là era scuvert l’american football. Entras lez ha el pli tard era lavurà sco security per l’organisatur da concerts Good News. E durant in openair èsi lura vegnì ad in inscunter cun la chantadura americana Whitney Houston.