Ils dis sco manadra dal campadi èn lungs, dis libers stgars. Bleras differentas lavurs èsi da far il medem mument e tuts vulan insatge. Pudair focusar sin ina chaussa è impurtant ed er da priorisar fitg bain las lavurs.
Silvana Beer manegia che la glieud haja dapli bregias che pli baud da connectar in cun l’auter. Perquai vuless ella gugent porscher als osps da «ses» campadi activitads ch’els vegnan en contact in cun l’auter. Uffants han sin in campadi spert contact in cun l’auter. Tar ils geniturs èsi uschia che cunzunt campers novs n’emprendan betg d’enconuscher ils vischins.
Ses satgados ha Silvana Beer er emplenì cun experientschas da viadis, er viadis fitg simpels senza grond luxus – senza electricitad, senza internet. Da l’autra vart giauda ella magari er in pèr dis luxurius per vesair la differenza tranter quels munds. Per ella èsi impurtant da prender ord mintga level, mintga cultura, mintga religiun insatge.
Na betg tut ils problems èn usche gronds sco quai ch’ins tratga.
Tge che motivescha ella saja che la vita è limitada. Silvana Beer emprova perquai cha far usche bler sco pussaivel en in di ed insumma adina. Quai possia er esser in zic stanclentus perquai ch’ella emprovia da pachetar memia bleras chaussas en in di.
Jau sun anc vid emprender in zic da propi far nagut e giudair.
In giavisch – forsa gia quest enviern – vuless ella ir trais, quatter emnas a sautar salsa.