«Nus n'essan betg la pli gronda scola da skis, ma la pli lunga.» Quai di Stephan Müller, il schef da la scola da skis Svizra Corvatsch-Pontresina. Sia scola è staziunada en quatter lieus da l’Engiadin'Ota. Ella tanscha dal Pass dal Malögia fin tar il Pass dal Bernina. Quatter reporters dals Cuntrasts èn stads in di da stagiun auta sin pista ed han guardà davos las culissas da la scola da skis.
Planisar è sco dar Tetris
La scola da skis Svizra Corvatsch-Pontresina è staziunada a Malögia, a Segl-Maria, a Silvaplauna ed a Puntraschigna. Anc avant 18 onns aveva mintgin da quels vitgs sia atgna scola da skis. Zic a zic han els fusiunà a quella dad oz.
Da stagiun auta è planisar savens sco dar Tetris.
160 scolastas e scolasts da skis èn engaschads. Els vegnan planisads ina giada qua ed ina giada là, gist nua ch’i fa basegn. Quai ch’è en la pratica grondius, è en la planisaziun ina sfida. I dat scolastas e scolasts ch’èn engaschads per quatter mais ed auters mo per in’jamna. Ed il dumber da giasts variescha dad in pèr paucs ad emna fin 600 giasts durant la stagiun auta. Simone Mercuri è in da quels che fa la planisaziun da l’emna. Da chattar per mintga giast in scolast e per mintga scolast in giast è sco da dar Tetris.
Dal giast tar il scolast da skis
Scolast da skis è in mastergn tschertgà. Quest onn ha Stephan Müller survegnì 240 annunzias dad intressents. 40 da quels ha el engaschà. En las retschas dals scolasts da skis èn indigens, scolasts e scolastas che vegnan mintga di da Chiavenna en l’Engiadina per dar scola ed anteriurs scolars da la scola da skis. Felix Welter è in da quels. El viva cun sia famiglia a Londra e passenta gia dapi adina sias vacanzas da skis a Puntraschigna. Da buob ha el fatg atras tut ils curs da la scola da skis. Dapi dus onns ha el midà dal giast tar il scolast da skis.
D'uffant n'avess jau mai pensà che jau vegn ina giada a purtar l'unifurma cotschna e ch'ils uffants vegnan suenter a mai.
-
Bild 1 von 2. Bildquelle: RTR.
-
Bild 2 von 2. Bildquelle: RTR.
Service public
La scola da skis Svizra Corvatsch-Pontresina è en funcziun durant l’entira stagiun d’enviern – era en la tranterstagiun cura che autras scolas da skis serran.
As imaginai, vus vegnis cun voss uffant plain plaschair anticipà mez schaner en il biro da la scola da skis e lura hai num: la scola da skis è serrada.
Quai saja service public, di Stephan Müller, il schef da la scola da skis. I saja impurtant dad esser qua en la tranterstagiun per famiglias cun uffants che na van anc betg a scola. Magari maina la scola atras curs mo cun in u dus uffants. Quels giasts turnian pli tard, cura che lur uffants van a scola ed han vacanzas da stagiun auta – e quai sur pliras generaziuns.
Or da l'archiv: