La scola da skis Lumnezia ha festivà ses 55avel anniversari cun ina «demoshow». Passa 100 participantas e participants, uffants e creschids han demonstrà lur abilitads sin skis ed aissas. Patrick Keller, il manader da la scola da skis Lumnezia e sia equipa da radund 40 scolastas e scolasts han gì ina massa d'organisar e preparar per che tuttas e tuts possian sa preschentar en la meglra glisch quella saira.
Quai dovra schon in pau gidanters. Igl è da metter si tut e quai dat in pau lavur, ma nus faschain gugent quai.
La preschentaziun ha fatg plaschair al public sco las reacziuns han mussà. Era ils participants e las participantas da la show, ch'eran da differentas scolas da skis da la Surselva, èn stads cuntents cun lur prestaziun.
-
Bild 1 von 4. Il public è pront per la preschentaziun da passa 100 uffants e creschids sin skis ed aissas. Bildquelle: RTR.
-
Bild 2 von 4. La preschentaziun d'ina gruppa da skiunzs. Bildquelle: RTR.
-
Bild 3 von 4. Ina gruppa ha preschentà ina furmaziun cun tizuns. Bildquelle: RTR.
-
Bild 4 von 4. Pliras scolas da skis ed aissa da la Surselva han fatg part alla «demoshow». Bildquelle: RTR.
Ina persuna che na dastga betg mancar sch'i dat ina occurrenza da la scola da skis Lumnezia è Venanzi Pally. Era quella saira è l'um da 71 onns preschent e lavura davos il grill. Venanzi Pally è gia radund 40 onns sin pista sco scolast da skis e n'ha anc betg terminà sia carriera.
Sch'els dumondan lura fatsch jau quai. Jau sun qua sch'els dovran mai.
Durant ses lung temp sco scolast da skis, ha Venanzi Pally observà differentas midadas. Oravant tut haja la tecnica dad ir cun skis ed il material midà. Plinavant na fetschia la scola da skis betg pli diever da funcs per communicar, mabain da telefonins.
Quest svilup ha era il manader actual da la scola da skis Lumnezia, Patrick Keller, observà. El ha cunzunt remartgà l'influenza da la digitalisaziun sin il mintgadi dals scolasts durant ils davos 12 onns ch'el ha dà scola da skis. Plinavant vesa l'um da 35 onns ina tendenza direcziun individualisaziun tar ils giasts. Tenor el dettia dapli giavischs per lecziuns privatas e per lecziuns mo dad in mez di.
Pli baud vegnivan ils uffants naven da glindesdi fin venderdi l'entir di e l'entira emna en la scola da skis. Oz han els dapli giavischs.
Malgrà las midadas, omadus umens èn da buna speranza ch'i dat anc blers onns la scola da skis Lumnezia. Cun passa 20'000 lecziuns per stagiun è la dumonda cleramain avant maun.