La segunda fin d'emna da november pon ins ir a kino a Turitg e guardar films rumantschs per pitschen e grond. Il festival vegn avert cun musica rumantscha da Chiara, Gianni Tschenett e Pascal Gamboni. Il venderdi saira è sut il motto «Nossa giuventetgna – il cosmos da la generaziun giuvna». En il center stattan realitads ed istorgias tut differentas da giuvens creschids. En il film «Sin drogas» raquintan ils ins davart lur experientschas cun meds enivrants, ils auters surpiglian plain levsenn in manaschi puril u fan in viadi aventurus enturn l'entir mund.
La sonda avantmezdi tutga als uffants. Lezs pon sfundrar en il mund fascinant dal far films, scriver lur atgnas istorgias, star davant e davos la camera ed emprender co ch'ins elavura e taglia il material registrà. Suenter hai num: prender il stgarnuz da popcorn, sa far cumadaivel e giudair films animads sco «La famiglia Babulin» u «Mes sentiments».
«Noss mintgadi – Alltag in der Rumantschia» èn ils films da la sonda suentermezdi che raquintan istorgias singularas da la vita quotidiana en il Grischun. Els accumpognan dus amis durant lur lavur al runal, van a culm cun ina da las paucas guidas da muntogna u ristgan dad ir en las profunditads dal Vereina.
«Films e serias èn ambassadurs da la diversitad culturala. Nus ans legrain da pudair mussar al public da Turitg questa multifariadad rumantscha e da dar in'invista exclusiva en nossa nova seria «L’ultim Rumantsch.
La sonda saira è deditgada al tema «Nossas cuntraversas – das gibtzureden» e cumenza a las 19:30 cun in'invista exclusiva en la nova seria rumantscha da tschintg parts «L’ultim Rumantsch» che cumpara il cumenzament da l'onn proxim. Suenter vegnan mussads films documentars che dattan da ponderar ed èn vegnids e vegnan discutads a moda cuntraversa, per exempel il film «Metzga da chasa a Schlans».
Il film sto raquintar istorgias, svegliar emoziuns e contemplar il mund or da novas perspectivas. In bun film po reflectar la societad, provocar dumondas ed ans animar da far patratgs davart nossa atgna vita ed il mund.
