Avess la populaziun votà l'entschatta settember, avessi dà in cler Gea a la lètg per tuts ed in Na a l'iniziativa 99%. Tar omaduas fatschentas hai dà in moviment vers il Na en la fasa principala dal cumbat da votaziun.
- La lètg per tuts fiss vegnida approvada cun ina clera maioritad da 63%.
- L'iniziativa 99% fiss vegnida refusada cun 57%.
Vinavant cler sustegn per la lètg per tuts
80% dals dumandads e dumandadas èn gia cleramain per u cunter la lètg per tuts. Quai correspunda al svilup usità durant talas campagnas da votaziun che las opiniuns vegnan cun il temp pli e pli cleras. Cumpareglià cun l'emprima retschertga è la cumpart da las persunas ch'èn encunter la lètg per tuts creschida da 29% sin 35%. Questa midada na correspunda percunter betg al svilup usità en connex cun ina fatschenta che vegn dal parlament u dal Cussegl federal. Igl sa tractia plitost d'ina polarisaziun vers il Na. Ma tuttina paran ils aderens da restar en la maioritad.
Guardà sur il spectrum politic pon ins dir: Pli dretg ch'ins guarda e pli blers ch'èn encunter. Il pli ferm argument encunter è che la lètg tranter um e dunna saja la suletta furma che possibiliteschia da dar vinavant vita. Perquai saja quella lètg da proteger. Tut en tut avessan l'entschatta settember quatter gruppas refusà la lètg per tuts:
- persunas che simpatiseschan cun la Partida populara Svizra
- persunas cun pli pitschna fidanza en il Cussegl federal
- commembers e commembras da baselgias cristianas independentas
- commembers e commembras da cuminanzas religiusas betg cristianas
Uschiglio sa mussa in lartg consens per la lètg per tuts sur l'entira societad ora. Il pli ferm argument persuenter è ch'i saja in pass gia daditg necessari per tractar tuts e tuttas tuttina. Vuschs criticas vegnan cunzunt dad umens sur 40 onns, persunas cun pli pauca furmaziun u ord chasadas cun entradas mesaunas. Vis sur las regiuns è da constattar ch'il sustegn è pli ferm en las citads che or en la campagna ed en las aglomeraziuns. Er è la Svizra taliana pli critica vers la lètg per tuts che la Svizra franzosa, tudestga e rumantscha. La gronda part dals dumandads e da las dumandadas quintan però che la fatschenta vegn approvada. Er tenor ils auturs da la retschertga fiss in Na a la lètg per tuts ina surpraisa, schegea che quai na possia betg vegnir exclaus dal tuttafatg.
Na a l'iniziativa da 99%
Er tar l'iniziativa da 99% ha in'auta cumpart da 69% da las persunas dumandadas gia ina clera opiniun per u cunter. Cumpareglià cun l'emprima retschertga l'avust è la cumpart da quels e quellas che dian Na creschida per 12%. Er quinta la gronda part che l'iniziativa fetschia naufragi. Qua sa mussa il svilup usità tar iniziativas: Durant il cumbat da votaziun vegnan ils puncts critics pli e pli preschents e bleras e blers midan dal Gea tar il Na.
Cleramain per l'iniziativa èn be anc aderents da las partidas sanestras. Tar tut las autras sa mussa pli u main cler in trend vers il Na. Er guardà sur la societad datti be anc ina gruppa che sustegna cleramain l'iniziativa da 99%, numnadamain persunas cun entradas bassas. Ils blers simpatisants chatta l'iniziativa anc tar persunas tranter 18 e 39 onns sco er en las grondas aglomeraziuns ed en la Svizra franzosa. Encunter l'iniziativa èn trais arguments pli u main tuttina ferms: La pratica actuala da taglia, proteger fatschentas pitschnas e mesaunas sco er la classa mesauna. Persuenter èn ils arguments d'ina pli auta taglia sin chapital e per dapli gestadad en chaussa taglia persvadents. Sin basa da las opiniuns actualas quintan ils auturs da la retschertga però che l'iniziativa n'haja strusch pli schanzas da vegnir acceptada.