Siglir tar il cuntegn

Header

Legenda: RTR
cuntegn

26 da settember «La lètg per tuts», «99%» e diversas decisiuns communalas

La «lètg per tuts» e «99%»: Davart quellas fatschentas sto il suveran svizzer decider questa dumengia. Era sin nivel communal spetgan pliras elecziuns e diversas ulteriuras fatschentas.

Ils 26 da settember han bleras vischnancas d'eleger lur gremis communals. I spetgan dentant era pliras votaziuns per credits. Sin nivel federal vegnan duas fatschentas decidì a l’urna: La lètg per tuts e l’iniziativa 99%

La lètg per tuts

Fin uss dastgan pèrs omosexuals sulettamain laschar registrar lur relaziun sco partenadi registrà, la maridaglia n'è pero betg pussibla. La «lètg per tuts» avra la lètg er per pèrs omosexuals. Sper la lètg duain pèrs omosexuals er survegnir ils medems dretgs tar la famiglia. Vul dir ch’els possian adoptar u survegnir uffants entras ina donaziun da sems.

Iniziativa 99%

L'iniziativa 99% vul augmentar la taglia per il pli aut pertschient. Tgi che viva sulettamain da sia facultad – vul dir entras entradas ord chapital – duai pajar dapli taglia, che quels che van mintga di a lavurar. Ils daners che fissan lura a disposiziun duajan vegnir utilisads a favur dal bainstar social u per relaschs da taglia da persunas cun damain daners.

Credits gronds e novs gremis sin nivel communal

Sin il plaun communal savessi dar pliras novas presidentas e presidents. Tranter auter cumbattan a Lantsch, Churwalden e Tumleastga plirs candidats per il timun da las vischnancas. Ulteriuras han da confirmar il president en uffizi.

Davart credits pli gronds han tranter auter San Murezzan e Cuira da decider. Cuira vul cumprar enavos l’areal da caserna da l’armada per 36 milluns francs. L’armada è numnadamain sa decidida da midar l’entira infrastructura al Rossboden. Cun quest spazi pudess la citad crear indrizs per lavurar ed viver.

A San Murezzan vegn decidì davart il futur da la veglia halla da chavaltgar. La vischnanca propona dad investir 1,5 milliuns per in preproject ch’ha la finamira da sanar quella suenter ch’auters projects en il passà avevan fatg naufragi.

RTR al puls da las votaziuns

Avrir la box Serrar la box
RTR al puls da las votaziuns

RTR tegna sin il current davart decisiuns communalas e las duas votaziuns federalas:

  • Sin www.rtr.ch chattais tut ils resultats, graficas ed analisas
  • Decisiuns impurtantas porscha era social media cun #votaziuns
  • Las novitads al radio rapportan mintg'ura dal pli actual
  • Reacziuns ed analisas pudais tadlar en emissiuns spezialas al radio las 12:00 - 12:30 e las 16:00 - 18:00
  • Il Telesguard resumescha las decisiuns a las 17:30 sin SRF Info

RTR novitads 06:00

Artitgels legids il pli savens

Scrollar a sanestra Scrollar a dretga