La regenza abolescha las mesiras da corona chantunalas: A partir ils 10 da favrer 2022 na ston uffants da las scolas popularas e privatas betg pli purtar la mascrina en scola. Per tuttas autras persunas resta l'obligatori sin l'areal da scola – Quai er per scolaras e scolars dal stgalim secundar dus.
Ils tests vegnian terminads
A partir da venderdi, ils 11 da favrer scrodan ultra da quai ils tests en las scolas sco er en ils manaschis. La raschun perquai è tranter auter, che las chadainas d'infecziun na pon betg pli vegnir interruttas en quest mument e ch'ils labors n'han betg las capacitads da far tants tests.
In'excepziun èn dentant las instituziuns da sanadad e da tgira. Là cuntinueschan ils tests enfin la fin favrer. A partir dal mars valan lura as recumandaziuns da l'Uffizi federal da sanadad.
La regenza reagescha sin il svilup positiv
La regenza reageschia cun questas decisiuns sin il svilup positiv da la pandemia. Malgrà auts dumbers d'infecziun tras la varianta Omicron n'èn ils ospitals betg surchargiads, e l'occupaziun da las staziuns intensivas sa reducescha vinavant. Il motiv per il bun svilup sajan tenor la regenza probablamain la gronda immunitad da la populaziun tras la vaccinaziun e tras infecziuns precedentas. Ultra da quai chaschuna Omicron main savens decurs grevs da la malsogna.
LCH crititgescha la schluccada
L’Uniun tetgala svizra da la magistraglia LCH crititgescha la schluccada da l’obligatori da mascrinas en scola. Quai giaja memia svelt, ha ditg Franziska Peterhans da la magistraglia svizra envers radio SRF. La pandemia na saja anc betg a fin. Avant il Grischun avevan gia plirs chantuns da la Svizra romanda stritgà l’obligatori da mascrinas.
Il chantun lavura senza il stab directiv da crisa
Grazia al svilup positiv, lavura il chantun a partir dad uss en las structuras regularas per superar la pandemia – pia senza il stab directiv. Quai ha communitgà la regenza plinavant. Uschia maina da nov l'Uffizi da sanadad il tractament a lunga vista dal coronavirus. Il contact tracing, il post da communicaziun sco er la hotline da corona restan vinavant en funcziun.
Il program per cas da direzza vegn reactivà
Fatschentas grischunas che pateschan da las consequenzas da la pandemia duain vinavant profitar d'agid finanzial. Uschia vala il program per cas da direzza 1 – che valeva enfin la fin da zercladur 2021 – er per l'ultim quartal da l'onn passà. Cunzunt interpresas da la gastronomia, da la gastronomia da notg u bogns vegnian a profitar da quels daners.
Per l'onn current è il chantun vid preparar in nov program per cas da direzza, quai sin basa da las midadas che la Confederaziun ha decis. La cumissiun da gestiun dal Cussegl grond sto anc approvar ils credits correspundents. En la sessiun da l'avrel vegn decis davart quai program per cas da direzza 2.