Siglir tar il cuntegn

Header

video
In bus da vaccinar va bainbaud da vitg tar vitg
Or da Telesguard dals 19.08.2021.
laschar ir
cuntegn

Coronavirus Bus da vaccinaziun sin viadi en 38 vischnancas grischunas

Cun il bus vul il chantun porscher la pussaivladad da sa laschar vaccinar e cussegliar. E da nov stat era a disposiziun l'infrastructura necessaria per vaccinar en firmas.

Sa laschar vaccinar senza stuair s’annunziar – quai saja sa mussà suenter las emprimas experientschas cun ils centers da «walk-in» sco in grond basegn tar la populaziun, scriva l’Uffizi chantunal da sanadad. Perquai datti davent dals 23 d’avust ina ulteriura pussaivladad da sa laschar vaccinar spontan en tut las regiuns grischunas. In auto da posta charrescha tras 38 vischnancas a travers il chantun, da Casti enfin Arosa e da Sedrun enfin en l'Engiadina. E quatter emnas pli tard datti in’ulteriura tura per la segunda vaccinaziun. L'urari dal bus è da chattar sin la pagina d'internet dal chantun Grischun.

Vaccinà vegn en il bus il vaccin da Pfizer/Biontech. Per quels che han gia survegnì ina dosa dal vaccin da Moderna, stat dentant era a disposiziun il vaccin da questa firma.

audio
Bus da vaccinar sco nova purschida
02:17 min, Actualitad dals 19.08.2021.
laschar ir. Durada: 02:17 minutas.

Impedir ina quarta unda

Sco Rudolf Leuthold, manader da l'Uffizi chantunal da sanadad di, sajan las cifras d'infecziun suenter las vacanzas creschidas. «Ils ultims dis avain nus gì tranter 40 e 60 infecziuns per di, e sche quai crescha uschia enavant essan nus arrivads en la quarta unda». Er en ils ospitals creschia il diember da pazients cun corona puspè. Cun il bus vul il chantun dar ina cunterpaisa a quest svilup.

Nus avain gì la davosa giada avant in onn uschè autas cifras d'infecziun, lura avain nus stuvì prender mesiras rigurusas, e quai vulain nus uss impedir.
Autur: Peter Peyer Minister da sanadad

Vaccinar spontan

Er en ils centers da vaccinar datti vinavant dis, che la glieud po ir senza s’annunziar. Ina survista ha il chantun medemamain activà sin sia pagina d’internet.

Plinavant stat da nov a disposiziun l’infrastructura necessaria per vaccinar en interpresas, scriva il chantun. Firmas interessadas pon uss s’annunziar.

RTR novitads 09:00

Artitgels legids il pli savens

Scrollar a sanestra Scrollar a dretga