Siglir tar il cuntegn

Header

Legenda: RTR grafica
cuntegn

Decisiuns a l'urna Iniziativas, elecziuns e moziuns communalas

Ina schelta da quai che vischnancas grischunas han decis a l'urna.

Scuol

Il suveran da Scuol ha decis davart il princip da transparenza. L'iniziativa – che vul surpigliar la lescha da transparenza chantunala sin nivel communal – ha survegnì las bleras vuschs, radund 73%. La cuntraproposta che la vischnanca aveva elavurà n'ha cunquai gì nagina schanza.

Tusaun

Il liberaldemocrat Curdin Capaul è vegnì reelegì sco president communal da Tusaun. El ha survegnì 448 vuschs, tge che correspunda a 56%. Ses concurrent, il verdliberal Ivo Rohrer ha survegnì 364 vuschs.

Samignun

Karl Jenal daventa nov president da Samignun. El ha survegnì 56% da las vuschs e cunquai gudagnà il cumbat electoral cunter il vicepresident en uffizi Clà Davaz. Il president en uffizi, Walter Zegg, aveva decis da betg pli candidar.

Mustér

Il suveran da Mustér po legalisar la construcziun dal skillparc, ina pista da trenament per mountainbikes. A l'urna ha il suveran ditg Gea cun 76% da las vuschs (751 cunter 233 vuschs). Questa purschida datiers dal ressort Catrina è bain gia en funcziun, è però vegnida bajegiada en ina zona betg confurma a quest intent. Perquai ha il chantun pretendì da reveder la planisaziun locala. Cun il Gea ha il suveran decis da stgaffir ina «zona per sport e temp liber al Crest d'Acletta».

En pli ha il suveran da Mustér approvà la revisiun da la lescha da bajegiar, quai cun 84% Gea (815 cunter 159 vuschs). En la revisiun vai per reglar da nov la construcziun d'indrizs per energias regenerablas sco sulegl e vent.

Surses

Il Suveran da Surses ha in nov contract da concessiun cun las Ovras electricas da Turitg EWZ. A l'urna ha il suveran approvà la nova cunvegna cun passa 93% da las vuschs (560 Gea cunter 39 Na). Cunquai che la concessiun tranter la EWZ e l'ovra electrica vest a Casti scada il fanadur 2022 hai duvrà quella midada. La nova concessiun vala enfin il 2050. La vischnanca da Surses po quintar cun entradas annualas dals tschains d’aua da radund 170’000 francs – quasi il dubel da las entradas actualas. En pli ha il suveran ditg Gea ad ina summa unica da passa 2,6 milliuns francs, perquai ch'il contract scada.

La radunanza communala da Surses aveva acceptà l'october da reglar da nov las concessiuns, uss è la fatschenta er approvada a l'urna.

Claustra

A Claustra vegni per famiglias e pèrs indigens pli favuraivel d'acquistar terren da bajegiar. Votantas e votants da Claustra han ditg Gea ad ina dumonda da principi, quai cun 64% da las vuschs (1'196 vuschs Gea cunter 673 vuschs Na). Uschia ha la vischnanca uss la pussaivladad da dar 13 parcellas en dretg da bajegiar. Enfin uss valiva la pratica da vender tal terren communal. In ulteriur avantatg saja da prevegnir a speculaziuns, sco era da sustegnair persunas indigenas e cumbatter la depopulaziun, argumentescha la suprastanza communala. La vischnanca burgaisa ha gia approvà questa dumonda.

En pli ha il suveran da Claustra approvà la segunda fasa per reveder la planisaziun locala, medemamain cun 64% (1'114 vuschs Gea, cunter 638 vuschs Na). I va surtut per actualisar la lescha da bajegiar, adattar il plan da zonas etc. per che las reglas communalas sajan congruentas a las leschas chantunalas e federalas. La dumonda co reducir zonas da bajegiar fa pir part dad ina terza fasa da revisiun.

La finala han votantas e votants da Claustra approvà il preventiv, quai cun 91% da las vuschs. Il 2022 prevesa la vischnanca d'investir il 2022 marcantamain damain cumpareglià cun il 2021. Las investiziuns nettas muntan a radund 13 milliuns francs. Er per il 2022 prevesa la vischnanca ina perdita da bunamain 2,2 milliuns francs. Malgrà quest deficit ha la suprastanza proponì da laschar il pe da taglia tar 90,2% da la taglia chantunala simpla, er questa fatschenta ha il suveran approvà cler cun 95%.

Trun

Sut la fracziun da Schlans datti definitivamain ina zona da ruaus per selvaschina tranter la Val Farbetg e la Val Plaunca. Il suveran da Trun ha approvà la lescha davart la zona cun 78% (410 vuschs Gea, cunter 118 vuschs Na). Sco provisori exista questa zona gia dapi il 2018. La zona cun plauncas suleglivas che vegnan spert terrenas saja predestinada per in zona da ruaus e quella saja gia sa cumprovada, aveva la suprastanza argumentà. Surtut la primavaira possia la selvaschina sa revegnir là. L'Uffizi da chatscha e pestga sco er l'Uffizi da guaud dal chantun sustegnan la midada da la lescha davart la zona da ruaus per selvaschina.

Tujetsch

L'aua da la funtauna Plauncas Malamusa en Val Milà vegn tschiffada. Quai è necessari per garantir il futur in provediment d'aua suffizient per l'intschess da la corporaziun Aua Cristalla. A l'urna ha il suveran da Tujetsch approvà la concessiun cun 93% da las vuschs (501 vuschs Gea, cunter 39 Na). Igl è planisà da manar l'aua da questa funtauna, che maina circa 150 liters la minuta, tras ina nova lingia e las lingias existentas en il reservar Pardatsch. Per dastgar tschiffar l'aua, ha la corporaziun Aua Cristalla dumandà la vischnanca per la concessiun. A l'urna ha il suveran dà quest consentiment.

Schiers

La resgia a Schiers vegn serrada, quai ha il suveran decis cun 70% da las vuschs (553 vuschs Gea, 236 Na). Igl è la segunda giada ch'i ha dà ina votaziun a l'urna davart il futur da la resgia. L'october 2013 aveva il suveran refusà l'idea da la suprastanza da serrar il manaschi, cun 166 cunter 30 vuschs. Uss ha ina persuna privata fatg ina moziun per revegnir a questa decisiun. La raschun è surtut che la resgia fa mintg'onn in deficit da 30'000 fin 40'000 francs e ch'il manaschi è vegnì serrà ad interim, tranter auter per motivs da segirtad. Tge che capita cun l'areal da la resgia, vegn sclerì en in proxim pass.

Vaz

Il suveran da Vaz ha decis da reveder anticipadamain la lescha da bajegiar, 66% da las votantas e dals votants han ditg Gea (813 cunter 321 vuschs). La vischnanca è bain vidlonder da reveder a moda cumplessiva l'entira planisaziun locala – quai dovria dentant bler temp e perquai vegnan midadas urgentas gia actualisadas uss en la lescha da bajegiar, argumentescha la suprastanza communala. I va tranter auter per reglar la construcziun d'abitaziuns secundaras ubain lubientschas per antennas da 5G. L'entira dumonda co reducir zonas da bajegiar vul la vischnanca dentant prender a mauns pir cun reveder la planisaziun locala.

Plinavant dat la vischnanca da Vaz in credit da 700'000 francs per ils Special Olympics World Winter Games, a l'urna ha il suveran ditg Gea cun 68% (854 cunter 358 vuschs Na). Quest'occurrenza per persunas cun impediments spiertals ha lieu l'onn 2029 en Svizra. A Lai èsi previs d'organisar las disciplinas da passlung, cursas da gianellas e sautar. Cunquai che las pendicularas, il turissem e l'arena da biatlon sa participeschan era vid ils custs, resta per la vischnanca la finala ina summa da 350'000 francs.

Domat

Il suveran da Domat sustegn il plan da finanzas per il 2022. Cun 87% ha il suveran approvà il preventiv (2'309 vuschs Gea, cunter 344 vuschs Na). Malgrà che la vischnanca quinta cun damain entradas da taglia causa corona sa mussa il preventiv per l'onn 2022 gulivà. Concret è previs in minus da bun 32'000 francs, quai tar entradas ed expensas da bunamain 39 milliuns francs. Il pe da taglia resta tar 87% da la taglia chantunala simpla, sco quai che la vischnanca ed il parlament avevan proponì. Quella segunda fatschenta ha il suveran approvà cun 80% (2196 vuschs Gea cunter 547 vuschs Na).

Arosa

La vischnanca reveda cumplainamain sia planisaziun locala. 61% da las votantas e dals votants han ditg Gea a la revisiun totala da la planisaziun locala (763 vuschs Gea, cunter 491 Na). Per l'ina vai per armonisar las leschas da las otg vischnancas dal Scanvetg ch'han fusiunà l'onn 2013 a la vischnanca Arosa. Per l'autra sto la vischnanca reducir zonas da bajegiar. Il project che vegn a l'urna definescha plinavant per exempel spazi d'abitar per indigens, zonas da mastergn, zonas per il svilup turistic, dentant era zonas verdas. Cumenzà ha l'entir process per questa revisiun gia l'onn 2015.

Tavau

I dat ina nova pista da skis dal Jakobshorn giu en il vitg, cun 80% da las vuschs ha il suveran approvà la fatschenta (3'175 vuschs Gea, cunter 778 vuschs Na). Per realisar la pista tranter «Usser Isch» e «Carjöl» èsi necessari da runcar guaud. Persuenter èsi previs da serrar ina veglia pista a val e da laschar crescher là guaud – i sa tracta da l'anteriura pista da FIS per slalom «Ischalp». Il suveran ha stuì decider a l'urna cunquai ch'i va per reveder la planisaziun locala decida il suveran da Tavau a l'urna.

Zernez

Emil Müller, il president communal actual da Zernez mida uschè da dir vischnanca e daventa president communal da Egnach en il chantun Turgovia. El ha gudagnà il cumbat electoral cunter dus ulteriurs candidats e survegnì 55,9% da las vuschs. Uschia vegn Emil Müller a bandunar la vischnanca en Engiadina Bassa la fin matg 2022. Lura surpiglia il vicepresident communal Riet Denot la responsabladad fin la fin da l'onn 2022.

RTR votaziuns 2021

Artitgels legids il pli savens

Scrollar a sanestra Scrollar a dretga