L'emprim di a Genova è Stefan Dobler stà sin la tschertga d'in bun recept da pesto. Genova è numnadamain la citad natala dal pesto, ma nagins dals genovans dumandads eran propi pronts da mussar exact co ins fa in bun pesto, uschia era betg noss protagonist Luciano Pirlo, quai na giaja uschè spontan e dovria temp. Ma Luciano ha declerà che per in bun pesto saja decisiv surtut la qualitad e la consistenza dal basilicum. Lez decidia quant bler ch'ins prenda da mintga ingredienza.
Ma in recept ha Luciano Pirlo tuttina anc tradì: mintga bun'ura mangia el in paunin cun pesto e lura possia el era supportar la clientella, uschia era ils Svizzers e las Svizras.
10 dis italianità sin las undas rumantschas e tut ils chanals dad RTR – nus festivain l’estate italiana e purtain a tuttas e tuts ch'èn restads a chasa en vacanzas in zic Italia en stiva. Dals 27 da fanadur enfin ils 7 d'avust ha lieu tar RTR l’Estate italiana.
La cuschina taliana è ina da las pli enconuschentas e popularas dal mund. Ils Talians e las Talianas èn loschs da quai ch'els cuschinan. Trais recepts originals da persunas localas èn la finamira da noss redactur Stefan Dobler. Tut quels recepts vegnan lura er publitgads qua cun impressiuns da video ed il recept per che er vus a chasa pudais cuschinar suenter els sch'i plaschan.
Dumondas e respostas persunalas:
- 🎵Chanzun preferida: Zucchero – Chocabeck
- 🍝Spaisa preferida: Spaghetti aglio, olio e peperoncini / Spaghetti alle vongole
- 🍨Gelato preferì: Nocciola
- 🏙️Citad preferida: Venezia e Roma
- 🏖️Regurdientscha d'uffant en Italia: Il sentiment cura ch'jau hai vis l'emprima giada la mar – in sentiment ch'jau hai anc oz
- 😀Tge plascha vi da l'Italia?: Sper la cuschina, cunzunt era l'esser da cumpagnia cun la famiglia ed amis
- 😡Tge na plascha betg vi da l'Italia?: La birocrazia extrema
