28.07.2026 – Genova
Benvenuti Genova! Sin il palpiri ina citad cun gronda impurtanza en l'istorgia da la musica taliana. Mia finamira: chattar ina chantautura u in chantautur che ma gida ad interpretar la chanzun rumantscha «Mia Olma» da Mattiu.
Genua ha ina gronda istorgia da chantauturs. Gino Paoli, Luigi Tenco, Fabrizio De André e blers auters han gì ina gronda influenza sin la musica taliana ils onns 50 fin 70. Ins discurra er da la «Scuola Genovese». In punct d’inscunter central è la bar Igea a Genova. Quella na datti oz betg pli.
Durant mes emprim inscunter cun Genova am para grev da badar questas ragischs. Musica aud'ins darar, e sche, lura musicistas cun violina, accumpagnadas dad in playback sur autpledaders ch'interpreteschan Vivaldi. Quel è dentant da Venezia.
En ina butia da musica survegn ins in pèr numers da telefon da chantauturs locals, ed era il numer d’ina scola da musica. Resposta a mes clom n'ha però deplorablamain nagin. Sche quai ha da far cun il temp da l’onn, mia idea u mes messadis scrits en ina masdira linguistica da vallader e talian cun chars salids da google translate ... chissà!
En las giassas stretgas da la citad chatt'ins ina butia da plattas, Flamingo Records. Ina pitschna butia cun ina selecziun bain curatada. Il possessur Massimo Perasso enconuscha or cun la scena da Genova. El n'è sez betg musicist, suna in pau bass e ghitarra per sasez e cura che jau al dumond sch'el avess plaschair da chantar cun mai, al vegn il scuffel.
Flamingo Records n'è betg mo ina butia da plattas. Massimo ha era fundà in agen label per sustegnair bands localas or da la scena da punk e hardcore. «Musicistas e bands genovesas èn fitg schenadas», am declera'l.
Vi da mia idea chatta’l dentant plaschair ed er cura che nus ans tadlain tras la discografia da Mattiu Defuns – la scola sursilvana – è el ed er il rest dals clients en la pitschna butia fitg intgantads. Cun vallader, mauns, pes ed englais vegnin nus perfin da translatar il text da «Mia Olma» en talian. Cun sia ghitarra empruvain nus ensemen sche la chanzun funcziuna cun noss nov text. Absolut.
Cura che jau propon da far il medem anc ina giada cun camera e microfons è però er el fitg schenà. Ussa stoss jau oramai prender «Mia Olma» che ha ussa num «Mia Anima» enavant cun mai a Bologna.
A revair Genova e grazia fitg Massimo!
Noss redactur Marcus Petendi è sin viadi per crear musica. Sia finamira è da translatar e crear trais chanzuns rumantschas per talian cun agid da musicistas e musicists talians. Quai pudess dentant anc esser ina pulita sfida: Malgrà ch'il num tuna in pau talian, na sa Marcus Petendi betg in soli pled talian. Cun agiuntar o's ed a's vi dals pleds rumantschs emprova el ses cletg. Da la musica ha il chantadur da la band Happy For Real e producent da musica però dapli idea.
Dumondas e respostas persunalas:
- 🎶Chanzun preferida: Adriano Celentano – il ragazzo della via gluck
- 🍝Spaisa preferida: Spaghetti carbonara
- 🍨Gelato preferì: Limone
- 🏙️Citad preferida: Venezia
- ⚽Regurdientscha d'uffant en l'Italia: Esser grond fan da Juventus Turin
- 😀Tge plascha vi da l'Italia?: La lingua, il mangiar ed il mar
- 😡Tge na plascha betg vi da l'Italia?: Panettone
