Siglir tar il cuntegn

Header

video
Joe Biden presta il sarament
Or da News-Clip dals 20.01.2021.
laschar ir
cuntegn

46avel president USA Joe Biden è en uffizi

Il democrat da 78 onns ha prestà il sarament en il Capitol a Washington. En ses emprim pled ha il democrat da 78 onns appellà al pievel american da s'unir e da far la pasch. E Biden ha gia prendì emprimas decisiuns.

Joe Biden è il 46avel president dals Stadis Unids. Il democrat da 78 onns ha prestà la mesemna il sarament en il Capitol a Washington. Avant era Kamala Harris sco emprima vicepresidenta dals Stadis Unids vegnida saramentada.

Biden vul ir ina nova via

En ses emprim pled ha il democrat da 78 onns appellà al pievel american da s'unir e da far la pasch. Joe Biden ha fatg cler en ses pled ch'el veglia ir ina via fundamentalmain nova. Ed el ha empermess da far tut per unir e medegiar il pajais. El vegni ad esser in president per tut ils Americans.

Ils Stadis Uni spetgian grondas sfidas ed el ha numnà la pandemia da corona, la situaziun economica difficila, ma er extremissem ed odi en il pajais. La democrazia haja survegnì il surmaun, ha ditg Biden. Emvers ils alliads
internaziunals ha il nov president american manegià ch'els vegnian a reparar las allianzas e collavurar cun il mund.

video
L'entir pled da Joe Biden (englais)
Or da News-Clip dals 20.01.2021.
laschar ir

Emprimas decisiuns gia l'emprim di

Gia l’emprim di en uffizi ha il president dals Stadis Unids Joe Biden, revocà pliras decisiuns da ses antecessur Donald Trump: Uschia ha Biden instradà ch’il pajais turnia tant pli spert tar la Cunvegna da Paris davart il clima.
Er ha il nov president franà la sortida ord l’Organisaziun mundiala da la sanadad.

Da nov vala er en tut ils indrizs federals in obligatori da purtar mascras da protecziun. Plinavant ha Biden cumenzà da schluccar la politica d’immigraziun rigurusa da ses antecessur en uffizi.

video
Joe Biden ha gia suttascrit plirs decrets
Or da News-Clip dals 21.01.2021.
laschar ir

RTR novitads 18:00

Artitgels legids il pli savens

Scrollar a sanestra Scrollar a dretga