La citad americana Minneapolis en il stadi federativ da Minnesota vul suenter la mort violenta da l'Afroamerican George Floyd remplazzar sia polizia locala.
Lur polizia na saja betg refurmabla, perquai duaja dar ina nov'organisaziun per la segirezza publica. Da quest avis è ina maioritad dal cussegl da la citad da Minneapolis. Ina tala midada vegnia dentant ad esser in cumbat lung e cumplitgà.
Protests e solidaritad enturn il mund
George Floyd era mort la fin da matg durant in'acziun d'arrest d'in policist alv. Dapi lura ai dà en ils Stadis Unids ed en blers auters pajais protests cunter rassissem. Per part èn quels protests stads violents. En bleras citads americanas hai dà sblundregiadas ed acts da vandalissem. En consequenza han pliras citads ordinà in scumond da sortir durant la notg.
