La barricada da la provinza Hubei en la China vegn abolida per gronda part. Quai han las autoritads localas annunzià oz. A partir da mesanotg dastgan persunas saunas bandunar la provinza.
En la metropola Wuhan, nua ch'il virus era rut ora oriundamain, vegn il scumond da bandunar la citad u la provinza dentant abolì pir ils 8 d'avrigl.
Sur emnas betg dastgà ir sin via
En la provinza Hubei èn facticamain 60 milliuns persunas stadas sut quarantina sfurzada. A Wuhan sez ha la glieud insumma betg dastgà ir sin via e quai emnas a la lunga. Las davosas emnas èn las cifras dals nov infectads da la provinza idas enavos considerablamain. En la China sez datti fitg paucs nov infectads, la gronda part da quellas persunas entran en il pajais: mardi han els annunzià 78 novs cas da corona, 74 pazients eran reentrads dad auters pajais. Totalmain ha la China annunzià dapli che 81'000 infectads cun il coronavirus. 3'277 èn fin ussa morts.
