Palestinais militants da la strivla da Gaza han cuntinuà d'attatgar cun rachetas territori israelian. Era la citad da Tel Aviv è danovamain vegnida attatgada - en la vischinanza da Tel Aviv è morta ina persuna. Cunquai èn mortas sin la vart israeliana enfin uss nov persunas. En la Strivla da Gaza èn mortas 140 persunas, quai tenor indicaziuns da las autoritads localas. Ultra da quai ha l'armada israeliana destruì en la Strivla da Gaza in bajetg cun biros da l'agentura da novitads AP e l'emettur Al-Jazeera. Omadus avevan communitgà ch'ins haja avertì els da l'attatga planisada.
Er en divers auters lieus en l'Israel datti adina puspè acts da violenza, donns vid chasas ed attatgas cun rachetas. Appels internaziunals per far pasch n'han betg gì success. L'Egipta ha rapportà che l'Israel haja renvià in'offerta d'intermediaziun.
Demonstraziuns da solidaritad cun la Palestina
En blers pajais han demonstrà pliras milli persunas per mussar la solidaritad cun ils Palestinais e las Palestinaisas. Demonstraziuns hai dà en l'Irac, la Jordania, il Libanon ed era en pajais da l'Europa. A Londra han demonstrà pliras milli persunas ed a Paris pliras tschient. Las autoritads franzosas avevan scumandà demonstraziuns. La polizia ha utilisà squittas d'aua e gas lacrimogen, ha rapportà l'emettur France-Info. A Basilea han radund 200 persunas demonstrà senza lubientscha cunter las attatgas ord l'aria da l'armada israeliana sin la Strivla da Gaza. A Genevrà en radund 300 persunas idas sin via.