Siglir tar il cuntegn

Header

schuldads avant helicopter.
Legenda: Il mument èn 5'000 schuldads americans staziunads en l'Irac. Keystone
cuntegn

Crisa en l'Orient Proxim Parlament da Irac vul che truppas estras sa retiran

Il parlament iracais vul che tut las truppas estras sa retirian da lur pajais. En ina sesida extraordinaria ha el approvà ina resoluziun che pretenda che la cunvegna tranter l’Irac ed ils Stadis Unids vegnia disdida.

Il pass è ina reacziun sin l’attatga americana or da l’aria ch'ha mazzà il general iranais Ghassem Soleimani datiers da la chapitala iracaisa Bagdad. Quella attatga è capitada sin terren iracais. Avant era gia il primminister iracais Adel Abdel Mahdi s'exprimì per la retratga da las truppas americanas. El ha ditg che la retratga da las truppas saja la meglra opziun per il pajais.

Trump smanatscha cun sancziuns severas

Il president american Donald Trump ha reagì sin questa decisiun. Sche l'Irac n'adempleschia betg las cundiziuns dals Stadis Unids per ina retratga da las truppas, ordineschian ils Stadis Unids sancziuns cunter il pajais. Quellas vegnian ad esser anc bler pli severas che quellas cunter l'Iran. Quai ha ditg Trump a bord da la Air Force One. Ils Stadis Unids na vegnian betg a bandunar l'Irac, uschè ditg che ch'il pajais n'haja betg pajà la basa da l'aviatica militara ch'ils Americans hajan construì là per pliras milliardas dollars.

En l’Irac èn staziunads var 5’000 schuldads americans. Lur missiun è da cumbatter la milissa terroristica Stadi Islamic. La resoluziun ch’il parlament iracais ha approvà pretenda che era tut las autras truppas estras bandunian il pajais. I va per truppas da pajais arabs e dal vest.

RTR novitads 17:00

Artitgels legids il pli savens

Scrollar a sanestra Scrollar a dretga