Las duas pli grondas partidas en il parlament da l'Uniun europeica ston quintar da perder lur maioritad. Tuttina resta la Partida populara europeica la pli gronda fracziun suandada dals socialdemocrats – quai tenor prognosas. Ferm avanzads èn però ils liberals ed ils verds.
Ils populists da la dretga ed ils naziunalists han fatg buns resultats en ils pajais gronds da l'UE sco l'Italia e la Frantscha. In grond stausch vers dretga n'è dentant betg da vesair – era pervi da l'auta participaziun. Quella è enturn 50 pertschient.
Resultats intermediars e prognosas en singuls pajais
- En Germania datti ina terrada per la gronda coaliziun, las partidas da l'Union e da la SPD. Tuttina restan CDU e CSU ensemen la forza pli ferma – quai cun bunamain 29% da las vuschs. Ils verds surpassan la SPD ed èn per l'emprima giada cun passa 20% sin plaz dus. Sin plaz trais è la SPD cun anc bunamain 16%.
- En Frantscha daventa la partida populistica da dretga, il Rassemblement National da Marine Le Pen, la forza la pli ferma – quai cun passa 23% da las vuschs. Per la partida LREM dal president, Emmanuel Macron, munta la victoria dals populists ina terrada. Surprendentamain daventan ils verds cun passa 13% terz ferma forza avant ils Republicans da Nicolas Sarkozy, ch'èn crudads sin 8% da las vuschs.
- En l'Italia mussan prognosas in triumf per la partida da la dretga, la Lega da Matteo Salvini. La Lega cuntanscha 30% da las vuschs. La partida da coaliziun Movimento Cinque Stelle perda bleras vuschs ed arriva cun bunamain 21% anc sin plaz 3. Sin plaz dus vegn la Partida democratica da l'opposiziun cun ina cumpart da vuschs da bunamain 22%.
- En l'Austria datti ina clera victoria per la ÖVP conservativa dal chancelier Sebastian Kurz. Cumpareglià cun las elecziuns dal 2014 ha la partida da Kurz pudì augmentar sias vuschs per 8,4% e vegn uss sin 35%. La SPÖ vegn actualmain sin stgars 24% e la FPÖ sin 18%. Cun 13% da las vuschs han ils verds cuntanschì lur meglier resultat da l'istorgia.
- Tar las elecziuns europeicas en la Gronda Britannia è la Brexit Party da Nigel Farage la pli ferma partida. Ella cuntanscha bunamain 32% da las vuschs. Segunda ferma forza èn ils pro-europeans liberaldemocrats che vegnan sin passa 20% da las vuschs. Ils Tories da Theresa May ston laschar plimas. Els èn sa tschentads cun ina cumpart da vuschs da gist ina giada bun 9% sin plaz 5.
- En il Portugal cuntanschan ils socialists regents ina clera victoria. La partida survegn bunamain 34% da las vuschs. Sin plaz dus vegnan ils conservativ-liberals socialdemocrats (PSD) cun bun 22% da las vuschs. E sin plaz 3 suonda cun ina cumpart da stgars 10% il bloc marxistic da sanestra BE.
- Er en la Spagna gudognan ils socialists regents da Pedro Sanchez – quai cun radund 33% da las vuschs. L'opposiziun conservativa vegn sin 20%, suandada dals sanesters da Podemo cun ina cumpart da vuschs da 10%.
RR novitads 06:00
