Siglir tar il cuntegn

Header

Aderents da Macron avant Tour Eiffel
Legenda: Il mument cu l'emprima calculaziun è vegnida annunziada al Tour Eiffel. Keystone
cuntegn

Elecziuns Frantscha Macron resta president – cler avant Le Pen

Il nov è era il vegl president: Emmanuel Macron resta per ulteriurs tschintg onns en uffizi.

La victoria da Macron è cunzunt da valitar sco terrada per Le Pen – differentas partidas han suenter l'emprima runda electorala appellà als electurs d'eleger il president en uffizi Emmanuel Macron e construir in mir cunter l'extrema dretga. Uschia ha per exempel il candidat da la sanestra, Jean-Luc Mélenchon, ditg ch'ins stoppia per tut pretsch evitar in'elecziun da la populista da la dretga Marine Le Pen.

Emmanuel Macron è tut auter che popular en la Frantscha. Blers Franzos e bleras Franzosas èn malcuntents cun la politica da Macron e resentan ses stil politic sco arrogant. L'um da 44 onns ha tenor differents experts er profità da la guerra en l'Ucraina ed il giavisch per stabilitad. Tant pli critic cun sasez è Macron alura er stà durant ses pled avant la Tur d'Eiffel.

Jau sai che blers han elegì mai per evitar las ideas dals extremists da la dretga e betg per sustegnair las mias.
Autur: Emmanuel Macron President franzos

El sappia tge ch'el stoppia far e tge responsabladads ch'el haja per ils proxims onns, uschia Macron. El na saja betg pli il candidat dad ina singula partida, mabain il president da tuttas e tuts. Ils proxims onns vegnian segir ad esser grevs, els vegnian però er ad esser istorics, uschia l'um da 44 onns.

Franzos en Svizra han elegì Macron

Persunas franzosas che vivan en Svizra han surtut dà la vusch ad Emmanuel Macron: Passa 81% hajan vuschà per el, ha il consul general franzos a Genevra Patrick Lachaussée dà enconuschent sin Twitter.

Levgiament per l'Europa

La victoria da Macron è in grond levgiament per l'Europa. La naziunalista Marine Le Pen leva sa distanziar pli fitg da l'Uniun Europeica ed avess pudì bloccar differents svilups da l'UE. Er il stretg contact da Le Pen tar il president russ Wladimir Putin ha procurà per intgins quitads en l'Europa.

La presidenta dal parlament da l'UE, Roberta Metsola, ha gia gratulà a Macron per sia victoria. Ella sa legria sin la collavuraziun cun la Frantscha. Ina ferma Uniun europeica, dovria ina ferma Frantscha.

Le Pen fa dapli vuschs ch'il 2017

Gia il 2017 han ils Franzos e las Franzosas gì da decider tranter Macron e Le Pen. Alura aveva Le Pen gì nagina schanza – ella aveva sulettamain survegnì in terz da las vuschs. Almain ord quest motiv dastga Le Pen esser cuntenta: ella ha fatg bler dapli vuschs ch'avant tschintg onns.

Quest resultat è in mussament per la disfidanza dal pievel franzos envers ils regents.
Autur: Marine Le Pen Politicra «Rassemblement national»

Il «Rassemblement national» vegnia uss a furmar ina ferma opposiziun per defender la Frantscha da la migraziun, malsegirezza ed in augment da la vegliadetgna da renta, uschia Le Pen. Las proximas elecziuns en Frantscha stattan gia avant porta: il zercladur elegia il pajais in nov parlament.

audio
Per tadlar: curt e cumpact
aus RTR Audio vom 25.04.2022.
abspielen. Laufzeit 1 minuta 4 Sekunden.

RTR novitads 21:00

Artitgels legids il pli savens

Scrollar a sanestra Scrollar a dretga