Siglir tar il cuntegn

Header

cuntegn

Evacuaziun en massa Turists duain bandunar zonas d'incendi en l'Australia

En vista ad ina nova unda da chalira che duai arrivar la fin d'emna duain turists bandunar las zonas d'incendi en l'Australia. En tut duain dieschmilli da persunas bandunar las citads pertutgadas a la costa, han appellà las autoritads. Dasper ils turists pertutga l'appel era persunas indigenas. Quai vala per in territori da 240 kilometer dal lieu da vacanzas Batemans Bay en direcziun sid fin tar il cunfin dal stadi Victoria.

La sonda duai dar temperaturas sur 40 grads e ferm vent. Quai pudess augmentar ils incendis da chagliom che furieschan gia dapi l'october.

Mancanza da carburant impedescha partenza

En il nord ed il vest da la zona d'evacuaziun datti lungas colonnas d'autos. Bleras persunas na pon gnanc partir perquai che tancadis n'han nagin carburant u las pumpas na funcziunan betg pervia da mancanza da current. Ultra da quai hai dà stretgas tar mangiativas ed aua en lieus a la costa. La raschun è che bleras vias èn serradas dapi glindesdi perquai che plantas derschidas blocheschan las vias.

Nagins turists svizzers en privel

En ils territoris d'incendis da chagliom en l'Australia na paran nagins Svizzers ils mument d'esser en privel. Perquai ch'i na sa tracta betg d'in schabetg nunspetgà han ils organisaturs da viadi avunda temp da chattar rutas alternativas per lur clients. Quai han differents organisaturs confermà sin dumonda da l'agentura da novitads Keystone-SDA.

Il departament federal per fatgs da l'exteriur EDA recumonda da s'infurmar tar ils organisaturs co ch'i vesa ora cun ils viadis en las regiuns pertutgadas.

17 persunas èn mortas, bleras valan sco sparidas

Ils fieus furieschan gia dapi l'october en l'Australia. Uss è la situaziun dentant vegnida anc pli precara. En la provinza da South Wales è fin uss brischà ina surfatscha da la grondezza da la Belgia, bunamain 1'000 chasas èn vegnidas destruidas. Dapi l'entschatta dals incendis èn fin uss mortas 17 persunas, dentant èn anc bleras persunas sparidas.

Ord l'archiv

video
Dutzende Buschfeuer in Australien ausser Kontrolle
Or da 10vor10 dals 08.11.2019.
laschar ir

RTR novitads 06:00

Artitgels legids il pli savens

Ir a sanester Ir a dretg