Quatter dis suenter l'explosiun catastrofala en il port da la chapitala libanesa Beirut, valan anc adina 45 persunas sco sparidas. Ultra da quai hajan ins chattà 25 baras. L'identitad da quellas na saja anc betg sclerida, ha ditg la sonda in pledader dal ministeri da sanadad libanes. Entant cuntinueschian las lavurs da salvament.
Er la Svizra ha tramess la gievgia ina delegaziun a Beirut che duai gidar. Entant ha il Departament federal d'affars exteriurs annunzià da sa participar cun ina segunda squadra d'experts a l'agid per la populaziun a Beirut. La gruppa sa cumpona dad experts da la medischina e da la construcziun.
Oz sonda duai avair lieu la sepultura dad unfrendas da la catastrofa. Activists han clamà ad ina manifestaziun da malencurada e da protest en il center da Beirut. Il moto da la manifestaziun è «giustia per las unfrendas, vendetga a la regenza». Ils activists renfatschan a la regenza negligientscha e fan responsabels quella per la explosiun.
Tar l'explosiun han il mardi passa 150 persunas pers lur vita e radund 1'500 persunas èn vegnidas blessadas. Grondas parts dal port da Beirut èn vegnidas destruidas cumplettamain ed er ils quartiers abitads en il conturn èn vegnids donnegiads fermamain. Fin a 250'000 persunas èn senza suttetg.
L'explosiun è probablamain vegnida provocada da la chemicalia fitg explosiva ammoniumnitrat. Tenor indicaziuns da la regenza è quella substanza vegnida deponida en il port durant onns senza mesiras da segirezza.
