BP vul er laschar profitar ses acziunaris dal grond gudogn. Il nov program da cumprar enavos aczias haja in volumen da 3,5 milliardas dollars, ha communitgà il concern. Plinavant duai dar ina dividenda da passa 6 cents per aczia, suenter ch'i ha dà l'emprim quartal 5,46 cents per aczia. Là aveva il concern er gia profità dals pretschs d'ieli, dentant ha il concern er stuì scriver giu daners pervi da sia participaziun al concern russ Rosneft.
Il grond gudogn da BP è sin il medem nivel sco quel da ses concurrents, sco ExxonMobil, Totalenergies e Chevron. Tut quellas interpresas han profità ferm dals pretschs auts da gas ed ieli, ch'èn s'augmentads fermamain suenter l'attatga da la Russia en l'Ucraina.
Ferma critica
Ils gronds gudogns dals concerns d'energia chaschunan ferma critica dals consuments e l'opposiziun en Gronda Britannia. Ils pretschs per gas e l'electricitad vegnan a crescher ferm er il proxim temp. L'interpresa da cussegliaziun Cornwall Insight quinta ch'in perchasa ordinari sto quintar a partir da l'october cun quintà enturn 3'900 francs. A partir dal schaner lura passa 4'100 francs en la tariffa da basa.
Quai è marcantamain dapli che prognostitgà la primavaira cun 3'200 francs. Là aveva la regenza er anc vulì dar in pajament supplementar da radund 460 francs per il temp tranter october fin mars. Experts han crititgà che quest agid na tanschia betg. Ils concerns renvieschan la critica e fan valair ch'els stoppian pajar milliuns pervi d'ina taglia extraordinaria sin gudogns da fatschentas d'ieli.
Or da l'archiv:
