- La gievgia è in attentader da suicidi sa siglientà a l'eroport internaziunal da Kabul.
- Tar l’attatga a l’eroport da Kabul èn mortas tranter 13 e 20 civilistas e civilists e 13 schuldads americans.
Biden smanatscha als terrorists
Suenter l’attatga terroristica a la plazza aviatica a Kabul, ha il president american Joe Biden prendì posiziun davart la situaziun en l’Afghanistan. El ha smanatschà als terrorists responsabels da prender vendetga e da chatschar els. Plinavant na sa laschian ils Stadis Unids betg intimidar da terrorists. El ha annunzià acziuns militaras cunter la milissa terroristica Stadi Islamic.
Evacuaziuns duain cuntinuar
Las evacuaziuns dad umans da l’Afghanistan duajan cuntinuar, sco il president american ha confermà en ses pled en la Chas’alva. Dapi mez avust hajan ils Stadis Unids e ses alliads evacuà passa 100’000 persunas ord l’Afghanistan.
La Svizra ha entant terminà si'operaziun d'evacuaziun or da l'Afganistan. En tut èn 378 persunas vegnidas transportadas da Kabul enavos en Svizra. Indesch burgais svizzers sa chattan anc sin terren afgan. Il Departament federal d'affars exteriurs è en contact cun els, sco el ha precisà ina communicaziun.
Reacziuns
La cuminanza internaziunala ha condemnà las attatgas terroristicas sin la plazza aviatica da Kabul. Il minister da l’exteriur Ignazio Cassis ha condolà a las famiglias da las unfrendas via Twitter.
Er il president franzos Emmanuel Macron e la ministra da defensiun tudestga Annegret Kramp-Karrenbauer han condolà.
Bandieras a mesa
Suenter l’attatga terroristica a Kabul mettan ils Stadis Unids las bandieras a mesa asta. Uschia veglian ins commemorar las unfrendas, ha ditg la pledadra dal president american Joe Biden. Las bandieras restan sin mesa asta enfin il glindesdi saira. Quai vala per la Chas’Alva, tut ils edifizis uffizials e las instituziuns militaras en ils Stadis Unids e per las ambassadas americanas e represchentanzas consularas en l’entir mund.
