El haja adina ditg che lur politica da migraziun saja er umana. Ins vegnia a laschar najar nagin. Quai ha ditg il minister da l'intern tudestg Horst Seehofer sonda envers la «Süddeutsche Zeitung». Quai na vegnia betg a surdumandar lur politica da migraziun. En il medem mument vegnia el dentant ad insister ch'ils migrants salvads vegnan anc en l'Italia suttamess ad ina controlla da segirezza.
Ina regulaziun nua che fugitivs avessan l'emprim gì da vegnir transportads en l'Africa dal Nord per far la procedura d'asil saja entant giud maisa.
Il davos temp ha l'Italia e la Malta adina puspè impedì l'entrada da las bartgas cun migrants salvads en lur ports. Las persunas han silsuenter savens stuì restar pliras emnas sin questas bartgas.
Lubì sbartgament d'Ocean Viking
Ils passa 80 migrants che sa chattan dapi sis dis sin la bartga da salvament «Ocean Viking» dastgan ir a terra en l'Italia. La regenza taliana ha dà la lubientscha da sbartgar al port sin l'insla Lampedusa. Quai rapporta l'agentura da novitads Ansa. Il bastiment aveva salvà la dumengia passa 50 persunas, silsuenter aveva ella surpiglià ulteriurs 34 fugitivs da bartga ch'ina autra organisaziun aveva salvà.
Ord l'archiv
RR novitads 09:00