En l’Austria cumenza oz il terz lockdown. Bleras fatschentas ston puspè serrar per las proximas trais emnas. Plinavant valan enfin mez schaner restricziuns da sortida e da contact. Cun questas mesiras vul l’Austria franar la derasaziun dal coronavirus.
Damain novas infecziuns
L’ultim lockdown dal pajais è stà tranter mez november fin entschatta da december. Dapi lura è il dumber da las infecziuns novas sa reducì. Ils ultims 7 dis ha l’Austria dumbrà 160 cas sin 100'000 abitants. En cumparegliaziun: La Svizra ha dumbrà l’emna passada 340 cas sin 100'000 abitants.
...puspè dapli cas en l'Italia
En l’Italia s’augmenta il dumber da novas infecziuns dal coronavirus puspè. L’uffizi da sanadad a Roma annunzia passa 19'000 novs cas confermads entaifer in di. En pli sajan bunamain 460 persunas mortas en consequenza da Covid-19 entaifer in di.
Dapi l’entschatta da la pandemia èn passa dus milliuns persunas s’infectadas cun il coronavirus en l’Italia; passa 71'000 èn mortas en consequenza. Per controllar la pandemia e garantir il contact tracing stoppia il dumber da novas infecziuns per di sa reducir sin 5'000 fin 6'000, uschia l’uffizi da sanadad talian.
