Per quai vai: Israel e la milissa islamistica Hamas èn sa cunvegnids sin ils emprims impurtants puncts per in plan da pasch. Quai suenter tractativas indirectas en l'Egipta. Tenor indicaziuns dal president american Donald Trump vegnian ils ostagis libers e l'Israel sa retiria cun l'armada enfin in punct definì.
Ils ostagis en la Strivla da Gaza: En la Strivla da Gaza èn anc adina 48 ostagis – da quels vivan anc 20, sco l'Israel rapporta. Il forum da las famiglias dals ostagis beneventa la cunvegna, di dentant era che lur cumbat saja pir a fin cura ch'il davos ostagi saja deliberà.
Relaschar praschuniers palestinais: Il plan da Trump prevesa che l'Israel relascha radund 250 praschuniers palestinais ch'èn sentenziads a praschun per vita duranta e supplementarmain radund 1'700 persunas ch'èn vegnidas arrestadas suenter ils 7 d'october 2023.
Quai di la Hamas: L'organisaziun terroristica conferma la cunvegna. Ella prevesia la fin dals cumbats en la Strivla da Gaza, che l'armada israeliana sa retiria ed access ad agid umanitar per il territori. Plinavant conferma la Hamas er il barat d'ostagis e praschuniers.
Quai di l'Israel: La cunvegna saja ina schanza per reconciliar e dettia novas perspectivas e speranza a la regiun, di il president da l'Israel Isaac Herzog. Per quai avess Trump merità il Premi Nobel da pasch. L'armada israeliana sa preparia sin l'emprima fasa dal plan da pasch. Il schef da stab general haja dà il cumond da «preparar posiziuns da defensiun ed esser preparà per tut ils scenaris».
Quai di Trump: I sajan ils emprims pass en direcziun dad «ina ferma pasch stabila ed eterna» di il president american. Ils ostagis vegnian pli probabel liber il glindesdi, ha Trump ditg envers Fox News.
Allegria e speranza en Israel ed en la Strivla da Gaza
-
Bild 1 von 5. Il bab dad Eitan Horn ch'è vegnì rapinà, festivescha suenter ch'ina cunvegna da pasch è vegnida communitgada. Bildquelle: Keystone.
-
Bild 2 von 5. Palestinais festiveschan suenter l'annunzia che Israel e la Hamas sajan sa cunvegnids per l'emprima fasa d'in plan da pasch. Bildquelle: Keystone.
-
Bild 3 von 5. Confamigliars e sustegniders dals ostagis israelians festiveschan a Tel Aviv suenter la communicaziun da la cunvegna. Bildquelle: Keystone.
-
Bild 4 von 5. Palestinais festiveschan suenter l'annunzia che Israel e la Hamas sajan sa cunvegnids per l'emprima fasa d'in plan da pasch. Bildquelle: Keystone.
-
Bild 5 von 5. Umans festiveschan sin la plazza dal rapiment d'ostagis a Tel Aviv suenter ch'ina cunvegna da pasch è vegnida proclamada. Bildquelle: Keystone.
I vegn spetgà ina segunda fasa: Ils Stadis Unids avevan accentuà ch'i dettia duas fasas da las tractativas. La pli auta prioritad hajan ils ostagis, en la segunda fasa duaja la pasch vegnir confermada e stabilisada. Per l'America munta quai era che la Hamas dat giu las armas.
Tgi vegn a reger la Strivla da Gaza?: Malgrà las speranzas che la guerra va a fin n'èn anc betg sclerids detagls decisivs. Latiers tutga en emprima lingia era l'administraziun da la Strivla da Gaza suenter la guerra ed il destin da la Hamas. Tgi che duai reger la Strivla da Gaza suenter la fin da la guerra n'è betg cler.
Co vai vinavant?: Il primminister israelian Benjamin Netanjahu vul convocar anc oz ses cabinet per approvar la cunvegna. Tenor in represchentant da la Hamas duain ils ostagis vivents lura vegnir surdads entaifer 72 uras. Quai vegnia spetgà per la fin d'emna da l'Israel. Trump ha planisà da sgular ils proxims dis en la regiun.