La polluziun da l'aria ha tenor in rapport nov la pli gronda influenza externa sin l'aspectativa da vita globala. Aria schubra pudess augmentar la media da vegliadetgna sin tut il mund per 2,3 onns, sco quai che perscrutaders da l'universitad da Chicago han communitgà il mardi. Las enconuschientschas sa basan sin datas evaluadas da nov per il «Air Quality Life Index (AQLI)» dal project.
Las consequenzas per l'aspectativa da vita èn cumparegliablas cun quellas dal fimar, passa trais giadas uschè grondas sco quellas dal consum d'alcohol e dad aua malnetta e passa tschintg giadas uschè grondas sco quellas d'accidents da traffic.
Tschintg mais dapli per Svizras e Svizzers
Per la Svizra han ils perscrutaders calculà che la glieud vivess radund tschintg mais pli ditg sche la Svizra respectass la limita recumandada da l'Organisaziun mundiala da la sanadad WHO per la polluziun da l'aria. Quella è tar tschintg micrograms pulvra fina per meter cubic. La Svizra ha tenor il studi ina valur da 9,4 micrograms per meter cubic.
In privel en l'Asia
Il studi ha accentuà che las sfidas pervia da la polluziun da l'ambient sajan repartidas inegual. En China possian ins gudagnar 2,5 onns cun aria schubra. A Bangladesch moran ils umans tenor il studi 6,8 onns pli baud pervia da la polluziun da l'aria.
Trais quarts da las consequenzas da l'impestaziun da l'aria datti pia en mo sis pajais: Bangladesch, India, Pakistan, China, Nigeria ed Indonesia. Ina cumparegliaziun cun datas pli veglias mussa qua in meglierament rasant da la situaziun surtut per la China.
Or da l'archiv: