Il Premi Nobel da la pasch va quest onn a la schurnalista Maria Ressa da las Filippinas ed al schurnalist Dmitri Muratow da la Russia. Quai ha communitgà il comité da nobel norvegiais. Els vegnan undrads per lur cumbat per la libertad d’opiniun. Entras il premi veglia il comité suttastritgar l’impurtanza da la libertad d’opiniun e la libertad da las medias.
Maria Ressa
La dunna da 58 onns ha fundà il portal online «Rappler», che crititgescha tranter auter la politica da drogas dal president filippin Rodrigo Duterte. Ella vala sco pli enconuschenta schurnalista filippina ed è gia vegnida arrestada in per giadas pervia da disfamaziun. Avant la fundaziun da «Rappler» ha ella manà ils biros da CNN a Manila ed a Jakarta.
In mund senza facts munta in mund senza vardad e fidanza.
Dmitry Muratov
El ha fundà la gasetta «Nowaja Gaseta» ed è era schefredactur da quella. Muratov vala dapi decennis sco simbol per la libertad da l'opiniun en Russia. Ensemen cun ils schurnalist da sia gasetta rapporta el da la corrupziun, nepotissem ed autras situaziuns insupportablas per exempel en Tschetschenia. Anna Politkowskaja lavurava era per la «Nowaja Gaseta».
Il Premi Nobel da la pasch vegn sco sulet Premi Nobel betg surdà a Stockholm, mabain ad Oslo. El vala sco premi politic il pli renomà dal mund. 329 candidats e candidatas, 234 persunalitads e 95 organisaziuns èn stadas nominadas quest onn per il premi. Ils nums dals nominads restan secrets per 50 onns.
