Ils oceans èn stads l’onn passà uschè chauds sco anc mai dapi che las datas vegnan registradas sin stgalim global. Quai mussa in studi dad in’equipa da scienziads internaziunala.
Ultra da quai sa stgaudan ils oceans pervi da la midada dal clima adina pli svelt, avertescha il team da 14 scienziads dad 11 instituts ord differents pajais. Il studi mussa ch'ils ultims tschintg onns hajan dapi ils onns 1950 mussà las temperaturas las pli autas en las mars.
La temperatura dals oceans fin en ina profunditad da 2 km è stada l'onn passà var 0,075 grads sur la media dals onns 1981 fin 2010, hai num en il studi. La quantitad d'energia ch'ils umans hajan mess ein ils oceans en furma da chalira durant ils ultims 25 onns saja enorma. Quella energia correspundia a 3,6 milliardas explosiuns da bumbas atomicas sco quella da Hiroshima.
Ord l'archiv:
RTR novitads 06:00