La Chadaina da Fortuna prevesa d’impunder la gronda part dals daners ramassads per las unfrendas dals terratrembels en la regiun da cunfin tranter la Siria e la Tirchia per la Siria. Bleras regiuns pertutgadas en Siria sajan isoladas. En pli regia en il pajais ina guerra civila dapi dudesch onns. Quai ha ditg la directura da l’organisaziun, Miren Bengoa, en in’intervista cun il «SonntagsBlick».
13 milliuns francs en 6 dis
La Chadaina da Fortuna ha rimnà 13 milliuns francs entaifer sis dis per las unfrendas dals terratrembels desastrus. La campagna dura anc enfin ils 17 da favrer 2023.
En in emprim pass vegnian ils daners duvrads per alloschis d’urgenza, aua da baiver, mangiativas, agid medicinal ed artitgels d’igiena. Entant il dumber d’unfrendas dals terratrembels s’augmentà sin passa 28'000.
