Ils gremis suprems da l'UE sa sfadian vinavant cun occupar lur posts principals. La dumengia saira las 23:00 è vegnì interrut l’inscunter suprem a Brüssel davart la successiun dal president da la cumissiun da l’UE, Jean-Claude Juncker.
Ils 28 schefs da stadi e da regenza n'èn betg sa cunvegnids ad in candidat. Perquai haja il president dal cussegl da l’UE, Donald Tusk, inscuntrà suenter la fin da la sesida tut ils 28 participants en discurs singuls per discutar la cuntinuazin, rapporta l'agentura da novitads DPA.
Tenor diplomats saja la schliaziun da cumpromiss cun il socialdemocrat ollandais Frans Timmermans giud maisa. Questa schliaziun han favurisà las grondas regenzas da l’UE sco la Germania e la Frantscha. Dentant han cunzunt ils stadis commembers da l’Ost da l’Europa fatg opposiziun cunter Timmermans.
Pussaivel pudess er esser da spustar las tractativas anc ina giada e quai fin mez fanadur. Sper l'uffizi dal president da la cumissiun da l'UE han ils schefs da l'UE da chattar anc persunalitads per quatter autras plazzas centralas.
RR novitads 06:00
