Siglir tar il cuntegn

Header

cuntegn

Finamira clera Partida verda vul finalmain far il pass en il Cussegl grond

Ils Verds vulessan finalmain avair represchentantas e represchentants en il Cussegl grond. La midada dal sistem d'eleger e la glista communabla cun la PS duai pussibilitar a cuntanscher questa finamira.

Sch'ins guarda sur ils cunfins grischuns vesan ins bain spert: Verd è en il trend. Tant tar elecziuns naziunalas sco er tar elecziuns chantunalas han partidas verdas fatg buns resultats ils ultims onns. En il Grischun n'è quest trend però anc betg arrivà. Bain tegn la Partida verd-liberala, suenter la demissiun da Josias Gasser, anc dus sez en il Cussegl grond – la Partida verda percunter n'ha fin uss nagina deputada u deputà. Quai duai dentant sa midar quest'onn.

audio
Elecziuns: Verda n'ha nagina tema dad ir sut en coaliziun cun PS
aus Actualitad vom 05.04.2022.
abspielen. Laufzeit 2 minutas 37 Sekunden.
Jau sun da buna speranza ch'i gartegia questa giada.
Autur: Anita Mazzetta Suprastanta da partida e candidata

Per ch'i gartegia questa giada ha la Partida verda decis da s'unir cun ils Socialdemocrats – la PS ch'è gia dapi decennis s'etablida en la politica grischuna. Anita Mazzetta argumentescha ch'ins veglia profitar ina da l'autra, nizzegiar il potenzial e consolidar las forzas da la sanestra.

Anita Mazzetta en il liber
Legenda: Anita Mazzetta è da buna speranza che la Partida verda fa ils 15 da matg il pass en il Cussegl grond. RTR

Nagina tema dad ir sut

Cuntrari a la Verda èn ils Socialdemocrats gia s'etablids dapi decennis en la politica grischuna e tegnan actualmain 19 sezs en il Cussegl grond. Tema ch'ins stoppia sa suttametter a la PS en quest cumbat electoral n'ha Anita Mazzetta betg. Tranter las partidas dettia in barat fitg intensiv, clear ch'i possia er dar discussiun, ins vegnia dentant adina puspè a bunas conclusiuns. Ils Verds na stoppian er betg s'adattar als Socialdemocrats, anzi: Ins possia profitar in da l'auter.

Nus essan duas partidas autonomas che marschan uss ensemen en quellas elecziuns
Autur: Anita Mazzetta Politicra dals Verds

Il sguard sur ils cunfins grischuns mussa: Entant che la Verda gudogna sezs, perdan ils Socialdemocrats. Gist capità en ils chantuns Vad e Berna. Èsi pia per consequenza l'intent da cumpensar las perditas potenzialas da la PS? Na, di Anita Mazzetta. Omaduas partidas veglian gudagnar tants sezs sco pussaivel, i fiss donn sche la PS perdess sin donn e cust dad els. L'idea da la coaliziun saja numnadamain da nizzegiar tut il potenzial da la sanestra e betg da perder vuschs. Sche quai funcziuna lura er propi, sa mussa ils 15 da matg.

RTR actualitad 07:00

Artitgels legids il pli savens

Scrollar a sanestra Scrollar a dretga