Tut tenor il tip e la vegliadetgna dal vehichel sto la MFK vegnir absolvida pli savens che tar auters. Entant ch'in auto nov sto vegnir controllà pir suenter tschintg onns ed in auto vegl mintga dus onns, ston ambulanzas u taxis per exempel reussir en ils tests da la MFK mintg'onn.
I deva gia adina ina massa vehichels da controllar. Ma dapi intgins onns na vegnan ils chantuns betg pli suenter cun lur lavur. Var 600'000 vehichels ch'èn da viadi sin las vias svizras avessan gia stuì absolver la MFK dapi in onn. En il Grischun èn quai var 16'700, 8,9 pertschient da tut ils autos en il Grischun. La problematica n'è dentant betg en tut il Grischun tuttina acuta.
Als posts externs vegnin nus suenter. Ma a Cuira èn ils retards creschids, perquai che nus n'avain betg l'infrastructura e la capacitad necessaria.
Pertge datti quest retard?
Cumenzà haja tut durant la pandemia da corona, nua ch'ins n'haja betg pudì controllar uschè blers vehichels sco quai ch'ins vuleva. Tut questas controllas han ins ussa stuì prender suenter ils onns passads. Dapi la fin da la pandemia da corona crescha il retard però vinavant. Claudio Reich manegia ch'i dettia plirs motivs per quai:
D'ina vart datti en il Grischun adina dapli vehichels, e da l'autra vart èn ils vehichels adina pli vegls.
Sco il manader da l'Uffizi per il traffic sin via declera, era la vegliadetgna d'in auto avant 25 onns en media en Svizra tar 7,4 onns. L'onn 2024 dentant era la vegliadetgna en media tar 10,5 onns. Uschia stoppian ins era controllar dapli vehichels, perquai ch'ils autos vegls drovian pli regularmain controllas che autos novs.
Ch'ils autos vegnan pli vegls saja cumbinà cun ina malsegirezza sin la fiera d'autos. Ils consuments na san tenor Claudio Reich betg sch'els duain cumprar ina auto electric u in auto cun motor convenziunal. Cunquai che l'avegnir saja intschert, cumprian ins il mument pli gugent in auto d'occasiun.
Tge po il chantun far?
Il ciclus d'examinaziun na stoppian ins betg adattar pervia da vehichels che vegnan pli vegls u pli moderns. I giaja per pudair augmentar la capacitad en il post a Cuira. Tenor Claudio Reich sajan ins gia londervi da schlargiar quella, uschia ch'i saja pussaivel da schliar il problem a media vista.
Fin lura vegnian tscherts vehichels priorisads. Per exempel camiuns, bus u taxis, pia tals ch'appartegnan a la categoria professiunala, vegnian examinads entaifer il termin fixà. Er autos novs, che ston vegnir controllads per l'emprima giada suenter tschintg onns, vegnan examinads aifer il termin. Pertutgads dal retard èn sulettamain vehichels in pau pli vegls, tar ils quals ins sto gia far controllas regularas.
Uschia na saja il retard era betg in ristg per la segirezza dal traffic sin las vias grischunas, manegia Claudio Reich. Be 1 pertschient dals accidents capitan pervia da defects tecnics. Sch'igl avess tuttina da dar in accident, alura fiss vinavant il possessur u la possessura da l'auto responsabel, n'emporta betg sche l'auto è gia vegnì examinà da la MFK u betg.