L'hotellaria en il Grischun ha nudà l’october 356'049 pernottaziuns – in minus da 5%, cumpareglià cun la medema perioda da l’onn passà. Quai scriva l’Uffizi per economia e turissem dal Grischun. Il dumber da giasts svizzers saja sa reducì per 10% sin 295'094. In ferm plus da giasts ha cunzunt nudà la citad da Cuira. In ferm minus han tranter auter nudà Mustér-Sedrun e Flem-Laax. En l'entira Svizra èn las pernottaziuns percunter s’augmentadas per 11% sin 3,2 milliuns.
Gia il settember aveva il Grischun nudà pli paucs giasts en l'hotellaria.
3% pli paucas pernottaziuns durant la stad
Durant la stagiun da stad, tranter matg ed october, ha il Grischun nudà radund 2,6 milliuns pernottaziuns – 80'000 pli paucas che l'onn avant.
Ferm sa reducidas èn las pernottaziuns tranter auter en Val S. Pieder (-20,4%), Flem/Laax (-19,2%) ed Arosa (-18,7%). Cuira percunter ha gì in augment da passa 30%, e la Val Surses cun 35% dapli pernottaziuns.
Guardà sin l'entira Svizra hai dà in augment da bunamain 22%, cumpareglià cun la stagiun da stad 2021 – quai èn 4 milliuns pernottaziuns supplementaras. Oravant tut la dumonda da l'exteriur è creschida marcantamain, per 84,6%. Totalmain 11,9 milliuns pernottaziuns da giasts svizzers muntan in minus da 6%, sco las cifras da l'Uffizi federal da statistica mussan.
