Il 2016 ha Cuira refusà in'iniziativa per abitaziuns pajablas fitg stretg pervia da 86 vuschs. Dapi lura saja la situaziun dentant anc ina giada sa pegiurada. Dapi il 1980 sajan ils tschains da locaziun en Svizra sa dublegiads, di Lukas Horrer, commember da la suprastanza da l'associaziun da locataris grischuna.
Perquai lantscha l'associaziun ensemen cun la PS e societads da construcziun ina nova iniziativa. Quella duai per l'ina proteger abitaziuns pajablas a Cuira e per l'autra promover novas abitaziuns pajablas.
Adina pli paucas famiglias, pli paucas persunas da la classa mesauna ed adina pli paucas persunas cun entradas pitschnas pon sa prestar in'abitaziun a Cuira.
Per gronda part dirzzà al profit
A Cuira vegnia bajegià bler. Il 2022 èn 181 abitaziuns vegnidas bajegiadas tenor las iniziantas ed ils iniziants. Bunamain tuttas da quellas sajan objects da rendita e per far gudogn. L'iniziativa vul dentant dapli abitaziuns cun tschains sin basa dals custs e senza profit per las possessuras ed ils possessurs.
La lobby d'immobiglias è fitg ferma e fa grondas renditas. Nus essan dentant da l'avis ch'ins duai bajegiar per il carstgaun e betg per la rendita.
A Cuira dettia mo 4,8% abitaziuns cun tschains sin basa dals custs e quai saja memia pauc cumpareglià cun autras citads. Immobiglias vegnian tractadas memia savens sco objects da rendita, e locatarias e locataris n'hajan nagina schelta e vegnian sfurzads da pajar pli auts tschains.
Per quai vul l'iniziativa francar en la constituziun che la citad sto per l'ina mantegnair abitaziuns pajablas existentas, e per l'autra procurar per dapli abitaziuns che vegnan dadas a locaziun sin basa dals custs. Co quai duai vegnir mess enturn, surlascha l'iniziativa a la citad.
