Ils 24 da favrer 2022 ha la Russia attatgà l’Ucraina. La guerra che ha cumenzà lezza giada dura fin oz. Entiras parts dal pajais èn destruidas, en blers lieus mancan electricitad, stgaudaments ed in provediment medicinal.
Novitads che fatschentan era la populaziun dal Grischun. La solidaritad e la prontezza da prestar agid sent'ins anc oz tar l’uniun «Agid per l'Ucraina en il Grischun» – era sch’ella è sa reducida durant quests quatter onns.
La damaun baud a las set chargian Retus Sgier e ses co-voluntaris la paletta dad in deposit a Cuira sin in camiun. Dapi quatter onns rimnan els rauba d’agid da persunas privatas, da scolas e d’interpresas. Cun voluntaris e donaziuns mantegnan els lur lavur.
Radund 30 camiuns èn viagiads ils davos quatter onns da Cuira en l’Ucraina. I vegnan furnids letgs d’ospital, sutgas cun rodas, generaturs, apparats tecnics, mobiglia – ma era giugarets per uffants. Tut material che vegn duvrà urgentamain al lieu.
«Nus pudain dotar scolas duas giadas»
L’uniun collavura stretgamain cun organisaziuns partenarias en l’Ucraina. Las glistas dals basegns vegnan directamain da las regiuns pertutgadas.
«Cun questas furniziuns pudain nus per exempel sustegnair scolas che han da stabilir lur infrastructura dubla», di Retus Sgier da la suprastanza da l’uniun. L’instrucziun ha lieu sur terra – «e sche las sirenas tschivlan pervia d’attatgas, ston las classas vegnir sut terra en locals da protecziun. Là dovri anc ina giada in’infrastructura cumpletta.»
Era sche l’engaschi sto vegnir integrà oz pli fitg en il mintgadi da las voluntarias e dals voluntaris, resta el constant.
«Entant che nus avain prestà a l’entschatta dapli che 100 pertschient, essan nus turnads enavos tar nossa vita normala. Nus pudain mo anc realisar quai che nus creain en noss temp liber – per ch’i restia cumpatibel cun noss mintgadi.» di la presidenta da l’uniun, Maria Wolf.
Stretgs contacts en la patria
Plirs commembers da l’uniun derivan sezs da l’Ucraina u han famiglia ed amis al lieu. Els stattan en contact regular e vegnan uschia a savair directamain nua ch’i dovra agid.
«Avant quatter onns essan nus vegnids svegliads da parents cun la frasa: 'Ia guerra ha cumenzà'. Ed ussa n’èsi betg chapibel ch’i va anc adina uschè ditg – e quant nunstanclentaivel ch’ils umans èn al lieu. Nus pudain mo assister a quai», di Maria Wolf.
Per quest onn è partì oz l’emprim camiun en l’Ucraina. Duas ulteriuras chargias èn gia planisadas per questa primavaira. Retus Sgier accumpogna il transport fin al cunfin, s’occupa da formalitads da duana e translaziuns. Suenter cuntinuescha il chauffeur sulet ils radund 2'000 kilometers fin a Charkiw – ina citad en vischinanza dal cunfin russ.
Trais dis è il camiun en viadi. Sche tut va tenor plan cuntanscha el il venderdi Charkiw. Per la populaziun en l’Ucraina signifitga la furniziun in sustegn concret en il mintgadi – per las persunas che gidan en il Grischun in segn d’attaschadadad.